Shillong, Lber 20
Ka Meghalaya Football Association (MFA) ka la pynkup burom ïa ka samla ïalehkai ba paw ka Jylla ka Bonifilia Shullai ha ka Sngi Balang ha Conference Room jong ka Shillong Sports Stadium, First Ground, Polo.
Ha kane ka sngi la ïadon lang u President ka synjuk u Bah Hamletson Dohling, u Bah Cliff R. Nongrum vice-president, Bah D.L Nongbri, Jt. Secretary, Bah Freddy Kharpran bad ki bahaïing jong kane ka samla.
Ka Bonifilia ka la ïoh mihkhmat ïa ka ri ha ka sien kaba nyngkong ha ka SAFF U-16 Women’s Championship 2024 kaba la kut dangshen ha Nepal. Ka India ha kane lympung ka la wan ha ka kyrdan ba-ar hadien ba shah rem noh ha ka Bangladesh lyngba ka tie-breaker da 3-2 kol ha ka jingïakhun final. Ka Bonifilia ka la ïoh ruh ban thep shi kol ha ka jingïakhun pyrshah ïa ka Nepal hadien ba ka India ka la jop haduh 10-0 kol.
Haba ai jingkren ha katei ka jingïalang, u Bah Hamletson u la pynpaw ïa ka jingsngew sarong ba ha kum kane ka kynti kaba mynta, ba ka jylla ka la lah lem ban sei ïa ki ‘thei ïalehkai kiba kynsai kum ka Bonifilia kaba ym shuh tang ba la shu shah jied ban mihkhmat, hynrei wat ban da don beit ha ka ‘First XI’ jong kynhun ïalehkai ka ri.
Kane ka jingshah jied ka Bonifilia ka long da shisha kum ka jingai mynsiem lem ïa kiwei pat ki ‘thei samla ïalehkai phutbol ka jylla, ba lada minot, trei shitom bad don ka discipline ha ka jingim, ka jingkhang ka long kaba la plie lypa ïa ki ban ïoh ban ïalehkai na ka bynta ka ri.
U Bah Hamletson u ai khublei ruh ïa ki kmie ki kpa jong ka Bonifilia kiba la shah sngewbha ha la ka jong ka khun ba kan don jngai na la ïing na ka bynta ban nang pyntbit shuh shuh ïa la ka jong ka jingim ïalehkai.
Ha kawei pat ka liang u Bah D.L Nongbri, u la ai khublei kyrpang ïa ka Lawmali Pyllun Sports Club, kaba don ïa ka kper sara (grassroot centre) ïa ki khynnah rit jong ka dong ban saiñ dur janai ïa ka sap ïalehkai phutbol, ha kaba mynta ka la lah ban sei ïa ka ‘thei ïalehkai ba kynsai kum ka Bonifilia.
Kane ka jingpynkup burom ka long da ka song pisa T. 15,000 ryngkat ka jaiñ thohrew stem lem bad ka momentos.
