Quetta, Lber:
Ki tnat iarap jong ka Pakistan ki la ioh sei ia 2 tylli ki met-iap na ka par dewïong kaba twa ha ka thaiñ Shathie jong ka Pakistan ha ka Sngi Balang bad kumba 8 ngut pat ki dang jah. Kat haduh mynta ym pat lah ban pyntikna la kitei kiba dang jah ki la iap ne im.
La ong ba ka jingbthei jong ki tyndong lyer kiba don hapoh jong katei ka par, ka la wanrah ia ka jingjulor bad pyntwa ia katei ka par kaba don hapoh ka nongbah Khost jong ka Pakistan kumba 80 Kilometre lane kumba 50 Mile na ka phang Sepngi jong ka Quetta. Kane ka la jia ha ka janmiet Sngi Ba-ar ha kaba ki don kumba 10 ngut kiba la shah set kut hapoh jong katei ka par ha ka por ba katei ka jingjia ka la jia.
U heh ka tnat tih mar poh khyndew na ka nongbah Balochistan, u Ghani Baloch ha ka step Sngi Balang u la iathuh ba ki kynhun iarap ki la ioh sei tang ia 2 tylli ki met na katei ka par dewïong hapdeng ka jing-iakhun shimiet- shimiet ban leit tih bad sei ia kiba sahkut hapoh jong katei ka par naduh ka miet Sngi Ba-ar.
Pynban kaba kham sngewkhia ka long ioh kitei 8 ngut ki bym pat shem ne lap, ioh ki lah ban nym im shuh namar shisien ba la tap bad twa ka par, ka lyer ring mynsiem ruh kam don shuh bad kim ioh shuh ruh ia ka jaka mih ba kin mih ha ka por kaba biang.
Namar la ong ba ki don kumba 8 ngut ki para ba iatrei ha katei ka par bad kiba la ia pyrshang ban pyllait im ia kitei kiba shah tap hapoh baroh, hynrei baroh kitei ki 8 ngut ruh ki la ngat bad sahkut pynban ialade. Hynrei la ioh pyllait noh ia ki hadien katto katne kynta da ki tnat iarap kiba leit ban tih bad tan ia ki na katei ka jaka.
