Shillong, Lber 20
Ka Meghalaya ka la lah ban khur haduh 22 tylli ki takma (2 ki ksiar, 3 ki rupa bad 17 ki rnong) ha ka sngi kaba ar jong ka lympung ïalehkai 3rd North East Games kaba dang ïaid mynta ha Kohima kaba ha Nagaland.
Ha ka Sngi Balang, ka Jylla ka la lah ban khur lai tylli ki takma rupa bad khatwei tylli ki takma rnong. Kane ka takma rupa ka la wan lyngba ka jingïalehkai Athletics lyngba ka Ritina Hanse hadien ba ka la wan ha ka kyrdan ba ar ha ka jingïakob mareh 400mts ki kynthei bad pyndep ha ki 1:02.05 sekhon.
Katba ka kynhun ki rangïalehkai athletics ka la khur ïa ka takma rnong ha ka Relay 4X100Mts hadien ba la lah ban pyndep ha ki 44.22 sekhon. Ïa kane ka kynhun la mihkhmat da u Kyrshananlang Shylla, Repol Dkhar, Renaldi Dhar bad u Henry Yoga A. Sangma
Nangta, ki takma rupa la khur ruh na ka jingïalehkai Pencak Silat lyngba u Kyrshanlang Lyngdoh (50 Kg) bad ka Usefulness Lyngdoh Nongum (70 kg). Katba ïa ki takma rnong la khur da u Indoarbiushbirth N. Marak (45 Kg), Lakshmi Rabha (60 kg) bad u Joplin Kharkylliang (65 kg).
Ha ka Table Tennis, ka Jylla ka la khur ïa ar tylli ki takma rnong na ka kynhun ki ‘rang bad ki ‘thei ïalehkai. Ha ka Boxing, ka Riteeka ka la jam sha ka semi final hadien ba ka la khur ïa ka jingjop ha ka quarter final jong ka kyrdan iakura kaba 57kg. Ka Men’s Double’s, ka Meghalaya ka la mad ïa ka jingshah rem ha ka Mizoram bad Manipur, katba ha ka liang ka Women’s Double’s ka la shah rem ha ka quarter final ha ka Nagaland bad Manipur.
Ha ka Wushu, ka Jylla ka la khur san tylli ki takma rnong lyngba ka Juliana Blah (45Kg), Bashisha Nongrum (48Kg), u Wanpher Kharkongor (56Kg), Francis R.R Songthiang (65Kg) bad u Mewan-pynshngaiñ Nongrum (70Kg).
Ha ka Football, ka Meghalaya ka la wanphai da ka jingjop ïa ka Tripura da 2-1 kol wat la ka la shah rem nyngkong ha ka Arunachal Pradesh da 2-1 kol ha ka sngi Ba-ar..
Ha ka Archery, ka kynhun ki ‘thei siat khnam ka Jylla jong ka Recurve Division ka la jam sha ka final. Ha ka liang ka kynhun ki rangïalehkai (Recurve) ka la shah rem noh ha ka Assam ha ka tie break hadien ba ki la ïakhaid mar 25-25. Te kumta kane ka kynhun kan ïaknieh ïa ka takma rnong ha kaba kan ïakhun pyrshah ïa ka Nagaland.
Ha ka Badminton, u Gregoreo Passah u la shah rem noh ha ka jingïakhun kaba para marwei ha u Jomie Singam da 14-21; 16-21. Ha ka Women’s Single, ka Netania T. Tariang ka la shah rem noh ha ka Pinky Karki (Arunachal Pradesh) da 15-21; 10-21.
Ha ka Boxing, hynñiew ngut ki nongïakura ki la jam sha ka semi final. Kine ki kynthup ïa u Sanjeev Maskut (48kg), Khrawbok Marweiñ (51kg), Banjop Nongkhlaw (54kg), Sunil Limbu (57kg), Ram Lyngdoh (60kg), Bhalang Shadap (67kg) lem bad ka Riteeka Sarki (57kg). Ka kynhun ki rangïalehkai Basketball ka la shah rem noh ha ka Mizoram da 39-88 basket.
Ha ka Lawn Tennis, ka kynhun ki rangïalehkai ka la lah ban pynliem noh ïa ka Arunachal Pradesh. Ha ki jingïakhun pre-quarter final kaab para marwei, u Ishant Rawat, Enrick Suchiang, Wankhraw Wahlang Nongrum ki la mad ia ka jingshah rem. Katba ka Sasha Kharbuli ka la khur ia kaj ingjop bad kan pynkhreh ïa ka jingïakhun quarter final ha ka sngi Palei. Ha ka Volleyball, ka Meghalaya ka la shah rem noh ha ka Mizoram.
