New Delhi, Lber:
Naba ka jingïoh kurup ïa ki dawai jyrhoh kiba la shah khang ban die ka la nang ïai bteng katba nang mih ki sngi ha kylleng ki jylla hapoh ka ri, ka la don ka jingsngewkhiah kumba la pynpaw da ka sorkar ha kaba kane ka buh jingma khamtam na ka bynta ki khyllung bad kumjuh ïa ki nongpang ba pyndonkam ïa ki.
Ki pulit ha kylleng ki jylla ki la ju ïoh ban kurup ïa ki dawai jyrhoh ïa kiba la shah khang ban die ne ban pynpoi ïa ki sha kylleng ki jaka naba ki riewshim kabu ki la pyndonkam ha ka ban dih kum ki drok.
Ki nongpynïaid ïa ki dawai jyrhoh ki la shah bthah ba kin ïai bteng ha ka ban phah khmih bniah ïa ki dawai ha ki Laboratory jong ka sorkar ïa kaba la sdang naduh u snem ba la lah, kane kan long hashwa ba kin ïoh jingbit na ka bynta ban phah ïa ki sha kylleng ki jaka. Kane ka hukum ka la long hadien kiba bun ki kompeni dawai kiba don ha kylleng ki ri ka pyrthei ki la ud shaphang ki dawai ïa kiba la phah da ki kompeni dawai kiba na India.
“Ka jingphah ïa ki dawai jyrhoh sha kylleng ki jaka kan sa long tad haduh ban da dep ban khmih bniah ïa ki jinglong bad ki rukom treikam jong ki ha ki Laboratory bad hadien ba la ai syrnot ban pynshisha ïa ka jingbym don jingktah jong ki, kane ka jingpyntreikam ka la long naduh u snem ba la lah,” la ong u Directorate General of Foreign Trade (DGFT) ha ka jingthoh kaba ki la phah.
Ki Lab kiba kham paw jong ka sorkar kmie ki kynthup ïa ka Indian Pharmacopoeia Commission, Regional Drug Testing Lab (RDTL – Chandigarh), Central Drugs Lab (CDL – Kolkata), Central Drug Testing Lab (CDTL – Chennai, Hyderabad, Mumbai), RDTL (Guwahati) bad ka NABL (National Accreditation Board for Testing and Calibration Laboratories) kine ki long kiba bit na ka bynta ban khmih bniah ïa ka jinglong jong ki dawai.
Kum shi bynta ban batai bniah halor ki rukom long jong ki dawai ba la pynmih na India ha ka ban lah ban pyntikna ïa ka jingbym ktah jong ki dawai, ka sorkar kmie ka la rai ban khmih bniah hashwa ban phah ïa ki sha kylleng ki jaka.
“Kine ki dawai jurhoh ki la dei ban shah khmih bniah ha ki Laboratory hashwa ban ïoh jingtip na ka bynta ban phah ïa ki sha kylleng,” la ong u heh ba dei khmih, ha kaba la bynrap shuh shuh da kaba ong ba ki la don ki jingshim sienjam ha kaba ïadei bad kane ka jingthmu khnang ban lah ban pyntreikam bha halor kane ka jingkhmih bniah ïa ki dawai.
