Shillong, Lber 20
U President ka BJP hapoh ka Jylla, u Rikman G. Momin ha ka Sngi Balang u la ong ba ki bor ba halor jong ka seng ki lah ban pynbna ïa ki kyrtong na bynta ka ilekshon ban wan sha ka Lok Sabha ha kine shi sngi ne ar sngi ban wan.
“Haduh mynta, ym pat don eiei. Lehse yn sa pynbna ha kine shi sngi ne ar sngi ban wan. Ngi ruh ngi dang ïai ap ïa kane,” la ong u Momin.
Kum ban shu kdew hangne, ki don 11 tylli ki kyrteng kiba ka seng ka la phah sha ka Central Parliamentary Board (CPB) na bynta ban jied ïa ki kyrtong ki ban ïa aireng ha kane ka ilekshon ban wan sha ka Lok Sabha.
Hashuwa, u Momin u la ïathuh ba ki don 6 tylli ki kyrteng kiba la phah na bynta ka Tura Parliamentary konstitwensi bad 5 tylli na bynta ka Shillong Parliamentary konstitwensi ba kynthup ïa ka kyrteng u Myntri ka Sorkar Jylla, Bah A.L. Hek.
Ki kyrteng jong ki 6 ngut kiba pan tiket na Tura Parliamentary konstitwensi ki kynthup ïa u MDC ka seng, u Bernard N. Marak, MLA barim, u Winnerson D. Sangma, Boston Marak, Riya Sangma, K.C. Boro bad Thomas Marak.
Haba phai pat sha Shillong Parliamentary konstitwensi, nalor ka kyrteng u Bah Hek, ki 4 ngut kiwei pat kiba la pan tiket ki kynthup ïa u President barim ka seng, Bah Ernest Mawrie, President ka BJYM, u Mewaker Lyngdoh, Dr. Fenela Lyngdoh Nonglait bad Sumitra Laloo.
Na ka liang u President u la ong ruh ba ka seng ka long kaba la khreh ban ïakhun ïa ka ilekshon ban wan bad ka jingïalap ilekshon ka la ïaid shaid-shaid, ha kaba ha baroh ki jaka, ka seng ka la pyntyllun ïa ki kam ki jam.
Kumba ka long mynta, ki seng kiba la dep pynbna kyrtong na bynta ka ilekshon MP ki kynthup ïa ka VPP – Dr. Ricky A.J. Syngkon (Shillong Parliamentary konstitwensi), NPP – Dr. M. Ampareen Lyngdoh (Shillong Parliamentary konstitwensi) bad Agatha K. Sangma (Tura Parliamentary konstitwensi), Congress – Bah Vincent H. Pala (Shillong Parliamentary konstitwensi) bad Saleng A. Sangma (Tura Parliamentary konstitwensi), RDA – Bah Robertjune Kharjahrin (Shillong Parliamentary konstitwensi) nalor 2 ngut ki kyrtong shimet na Shillong Parliamentary konstitwensi – Prof. Lakhon Kma bad Bah Peter Challam.
