Guwahati, Lber:
Naba ka ilekshon Lok Sabha ka la jan, ki jingpyntreikam hapoh ka seng BJP ki la nang bun.
Ha kaba ïadei bad kane ka bynta ka la don ka jingïalang kaba heh ïa kaba la pynlong ha phyllaw jong ka Hafiza Madrasa jong ka shnong Fersiati hapoh ka jingtreikam jong ka Kumlia Gaon Panchayat kaba hap hapoh ka Biswanath LAC.
Ha ka jingïalang kaba la long ha ka lah sngi U Blei hapoh ka jingpynïaid jong u Chairman jong ka Biswanath Mandal u Pranodipta Rajkhowa, ki la don kumba 460 ngut ki shynrang bad kynthei, kynthup ïa ki President barim jong ka Gaon Panchayat u Mafida Khatun bad u Amizul Haque, ka dkhot barim jong ka Regional Panchayat ka Hima Devi, u Pradeep Sapkata, u Vice-president jong ka AMSU Biswanath District u Aminul Haque, ki la leit ban pynïasoh bad ka seng Bharatiya Janata Party.
Ïa kane ka jingïalang la pynlong da u Secretary jong ka Biswanath Mandal u Milan Borah katba u MLA jong ka Biswanath u Pramod Borthakur u la ong ba ka seng kan sa jop ha ka ilekshon Lok Sabha ka ban wan ha kaba kan sa ïoh jingkyrshan shibun ki vote.
U la buh ruh ka jingkyrpad ïa baroh kito kiba la pynïasoh bad ka seng ba kin bteng ha ka ban trei na ka bynta ka burom jong ka seng BJP. Ka jingpynkhreh na ka bynta ka jingïakhun ïa ka ilekshon ka dang ïaid shakhmat.
