Nongpoh, Lber 20
Sa tang kumba katto-katne taïew ban jied ïa ki nongmihkhmat sha ka ïingdorbar Lok Sabha, ka ktem jong ka United Democratic Party (UDP) ha Ri Bhoi District ka la pra phom hadien ba ki nongïalam ba hakhmat ka seng ki la rai ban mih noh. Kane ka rai kaba ki shim kam dei satia ka rai khyllung khynnah, hynrei ka dei ka rai ba ki shim hadien ka jingïasyllok bad pyrkhat sani bha para nongïalam.
Ki nongïalam ba hakhmat kiba la mih noh na ka UDP ki kynthup naduh u MLA barim ka Mawhati, Bah Donbok Khymdeit uba bat kum u Working President ha ka jylla bad ruh ha ka Ri Bhoi District, u Bah Raphael Massar, Chief Adviser ka UDP Ri Bhoi, u CEM barim ka KHADC Bah Rangkynsai Makdoh, Adviser ka UDP Ri Bhoi, ka Kong Queen Mary Rymbai, Joint Secretary ka UDP Women’s Wing ha ka jylla, u Bah Biolkingstar Timung, Auditor ka UDP Ri Bhoi, u Bah Jeffrey Khymdeit, Joint Secretary ka UDP Youth Wing ha ka jylla, u Bah Prosper Dorphang, Secretary ka UDP Youth Wing ka Ri Bhoi, u Bah Rajes Lapang, Working President ka UDP Youth Wing ka Ri Bhoi lem bad kiwei kiwei ki nongïalam ba hakhmat jong ka District.
Kine ki nongïalam kiba la mih noh ki lah ban leit ïasoh noh sha ka seng NPP ha kine sngi ban wan. Katba na ka liang u Bah Donbok Khymdeit bad ka Kong Rona Khymdeit kin sa pynïasoh sha ka seng NPP ha ka 22 tarik mynta u bnai ha Sajer, Nongpoh, ka ban pdiang da ki nongïalam ka NPP.
Haba kren sha ki lad pathai khubor ha ka janmiet Sngi Balang, u Bah Donbok Khymdeit uba dei uwei na ki dkhot ba la rim bha ka UDP u la ong, kum ki nongïalam hi kim don satia ïa kano-kano ka daw shimet bad ka UDP ha Ri Bhoi ne ha ka jylla, hynrei ka dei ka sienjam kaba ki la shim hadien ka jingpyrkhat sani na ka bynta ka lawei jong ka dong ka thaiñ bad ka jaidbynriew ban ai ïa ka jingshakri kaba kham paka bad wanrah ïa ka roi ka par na ka bynta ka District hi baroh kawei.
U la ong ruh ba kum ki nongïalam kim kwah satia ban buhrieh ïa ki jingshisha da kaba ong ba kane ka kam ban iehnoh ïa ka UDP kaba ki la shakri baroh shi katta kam dei satia ka rai khyllung khynnah bad kaba shu rai syndet, hynrei ka dei ka rai kaba ki la shim hadien ka jingïakynduh bunsien para nongïalam. Kumta ki la sngewdei ban mih noh na kane ka seng kaba ki la don baroh shi katta bad pynpaw ruh ba naduh mynta ka sngi, kim don shuh ïa ka jingïadei bad ka UDP. Ha kawei pat ka liang, ka la mih ruh ka khubor hamsaïa ba kine ki nongïalam kiba la mih noh na ka UDP, ki don ïa ka jingthmu ban pynïasoh noh sha ka NPP ha kine ki khyndiat sngi kiban wan, wat lada kitei ki nongïalam ki la kyntait ban ïathuh sha ki nongthoh khubor da kaba ong ba ïa mynta kim pat shim satia ïa ka rai sha kano ka seng kin leit ban pynïasoh.
