Shillong, Lber 20
Ka National Cricket Academy jong ka BCCI ka la jied ïa saw ngut ki ‘thei ïalehkai kriket ba kynsai ka Jylla ba kin shim bynta ha ka jingkilanmet jong ka North East Senior Women’s Camp ka ban sdang naduh ka 22 tarik u Ïaïong haduh ka 16 tarik u Jymmang mynta u snem ha Rangpo, Sikkim.
Kine ki kynthup ïa ka Debasmita Dutta, Ajima Sangma, Luiza Tamang bad ka Monica Lyngdoh Phawa. Kine ki ‘thei ïalehkai kin sa ïasoh lang bad kiwei ki ‘thei ïalehkai kriket jong ki san tylli ki jylla ha ka North East Zone kata ka Sikkim, Manipur, Mizoram, Nagaland bad Arunachal Pradesh ha kane ka jing-kilanmet.
Ïa kine ‘thei ïalehkai la jied da kaba khmih bniah ïa ka jinglah ban ïalehkai bha jong ki ha ka 2023-24 BCCI tournaments, ka Senior Women’s T20 Trophy kaba la long ha u Risaw mynshem snem bad na ka Senior Women’s One Day Trophy kaba la long ha u Kyllalyngkot mynta u snem.
