Shillong, Lber 20
U Bah Process T. Sawkmie, MLA barim u la pynpaw ba u sngew kit ram bha halor ka jingtrei shitom jong ki sister ban kyntiew ïa ka pule puthi bad kiwei ki kam shakri Blei ha ka jylla.
U la pyrto ïa ka jinglah ban aiti lut jong ki ha ki kam ba ki shakri bad halor ka jingnohsynñiang sha ka imlang sahlang.
Ïa kane u Bah Saw-kmie u la pynpaw haba ai jingkren kum u kongsan ha ka Sngi Balang ha ka jingplie ïa ka Annual Sports Meet jong ka Rosario Secondary School, Mawsiatkhnam ka skul kaba dang hap hapoh u pud u sam jong ka Mawlai Constituency.
Ha kane ka sngi u Bah P.T Sawkmie u la kyntiew ruh ïa ka lama kum ka dak ba la plie ïa ka Annual school sports kaba lai sngi ka ban kut ha ka Sngi Thohdieng ha ka jingdon ryngkat ka sister-headmistress, Bakhmihlang Rangtong, sister A. Thongni, ki nonghikai bad kiwei.
Ha kane ka sngi la ïoh ban sakhi ïa ka March pass na ki house, ba kynthup ïa ka yellow, red, green bad blue, ka jingshad, jingrwai, ka dril bad ka jingiamareh 100 mitar.
U Bah Sawkmie u la pynpaw ruh ba ki don ar bynta na ka bynta ki khynnah ha ka sport, ka professional bad ka fitness. U la ong, kin don ki khynnah kiban angnud ban long ki professional ne ban im ja da ka jingïalehkai sport bad don pat ki ban ïalehkai na ka bynta ban bha met bha phad bad ban ïoh ïa ka met bakoit bakhiah.
Ha kane ka sngi la ïoh ruh ïa ka jingkren na ka sister headmistress kaba la ai khublei ïa u Bah Sawkmie halor ka jinglong la kloi jong ka ban don ryngkat bad ki ha kane ka jingpynïalehkai sport ba shisien shisnem jong ki. I la pynpaw ruh ïa ka jingsngewnguh halor ka jingnohsynñiang u Bah Sawkmie sha ki na ka bynta kane ka jingïalehkai.
