Mumbai, Lber:
U heh nongïalam jong ka seng Vanchit Bahujan Aghadi (VBA) u Prakash Ambedkar u la tyrwa ka jingai jingïarap jong u na ka bynta ki kyrtong jong ka seng Congress ha ki 7 tylli ki Lok Sabha konstitwensi ba la mang na ka bynta ka seng kum shi bynta jong ka jingïasamlang ïa ki konstitwensi hapdeng ka kynhun ba ïatreilang hapoh ka Maharashtra Vikas Aghadi (MVA).
Ha ka shithi ba la phah sha u President jong ka seng Congress u Mallikarjun Kharge ha ka sngi Ba-ar, u Ambedkar u la pynpaw ka jingbym sngewtynnad ha kaba ïadei bad ka jingbym donlang jong ka seng VBA ha ka jingïalang ha kaba ki nongïalam jong ka MVA ki la bat ïa ki LS konstitwensi.
“Ka seng Shiv Sena (UBT) bad ka seng NCP (Sharadchandra Pawar) ka la kyntait ban sngap ïa ka jingpynsngew jong ka VBA halor kiba bun ki jingïalang jong ka MVA. Ngim shaniah shuh ïa kine ki seng baroh artylli namar ka jingleh jingkam jong ki pyrshah ïa ka VBA,” u la thoh.
Ka jingtyrwa jong u Ambedkar sha ka seng Congress ka la long hadien ba ki nongïalam jong ka kynhun MVA ki la ai ïa ka rai ban tyrwa ïa saw tylli ki konstitwensi naduh ba ki la don ka jingpyrkhat ba um da don mon eh ban leit ban pynïasoh bad ka kynhun ka liang pyrshah. Ha kaba ïadei bad kane, u Ambedkar u la dawa da 12 tylli ki konstitwensi na ki 48 tylli ki Lok Sabha konstiwensi na ka bynta ban leit pynïasoh ha ka kynhun MVA.
