Shillong, Lber 21
Ka MLP Combine bad ka Police Head-quarters ki la ïoh jingjop ha ka lympung ïalehkai Inter Office Shillong League 2024 ba la pynïaid da ka Shillong Cricket Association ha ka Sngi Palei ha madan Urkaliar, Shillong.
Ha kane ka jingïakhun, ka MLP Combine ka la pynliem noh ïa ka MeECL da 6 run. Ka MLP ka la shimti ban tied nyngkong ha kaba ka la kamai 134 run bad shah pynhap 9 wiket ha ki 12 over. U Pynsuk Nongsiej u la tied 63 run na ki 25 bol bad u Hilarious Khonglah u la ïoh 39 run na ki 20 bol. Katba u Meban Warjri bad u Robert ki la shim mar 3 wiket.
Haba ban beh ïa ka thong, ka MeECL ka la kamai tang 127 run bad shah pynhap 5 wiket ha ki 12 over. U Arbinus u la tied 53 run na ki 21 bol bad u Johnny u la ïoh 32 run na ki 20 bol. Katba u Pynsuk Nongsiej (Player of the Match) u la shim 2 wiket bad shi wiket da u Wanaibok.
Haba phai sha kawei pat ka jingïakhun, ka Police Headquarters ka la jop da 12 run ïa ka Police Xl. Ka Police Headquarters kaba la kam trai ban tied nyngkong, ka la kamai 99 run bad shah pynhap 4 wiket ha ki 10 over. U Ricky Nadia u la tied 39 run na ki 28 bol bad u A.Mandal u la ïoh 20 run na ki 7 bol. Katba u Donboklang Kharkongor bad u Arup Das ki la shim mar shi wiket.
Haba wan beh ïa ka thong ka Police Xl ka la kamai tang 87 run bad shah pynhap 5 wiket ha ki 10 over. U Arup Das u la ïoh 29 run na ki 11 bol bad u Ben Mawthoh u la ïoh 16 run na ki 18 bol. Katba u Bok Nongkhlaw bad u Selbin K. Sangma (Player of the Match) ki la shim mar shi wiket.
