Shillong, Lber 21
Hadien shi sngi ba la shah pynthut ha u slap, ka East Khasi Hills Cricket Association ka la lah ban bteng biang ïa ka lympung ïalehkai 3rd District League T20 Cricket Tournament 2024 ha ka Sngi Palei ha kaba ka Nongdawah CC bad ka Sohra Combine CC ki la ïoh jingjop.
Ha ka jingïakhun kaba nyngkong kaba la long ha Shortimai Syiem Stadium kaba ha Smit, ka Nongdawah ka la pynliem noh ïa ka Thangsning CC da 5 runs (DLS method). Ka Nongdawah ka la kam trai ban tied nyngkong ha kaba ka la ïoh 127 run bad shah pynhap 6 wiket ha ki 15 over.
U Wankitlang Nongpluh u la ïoh ïa ka shiteng spah (66 run na 38 bol). Katba u Khrawkupar Kharumnuid u la shim 2 wiket na ka bynta ka Thangsning.
Hynrei hadien la pynduna noh tang 9 over bad ka Nongdawah ka la buh ïa ka thong da 76 run. Haba wan beh ïa ka thong, ka Thangsning ka la ïoh tang 70 run bad shah pynhap 3 wiket ha ki 9 over. U Badap Pura Nongkhlaw u la tied 20 run na ki 14 bol. U Rilanstar u la shim 3 wiket na ka bynta ka Nongdawah. Ïa ka nam Player of the Match la khur da u Wankitlang Nongpluh.
Haba phai sa kawei pat ka jingïakhun kaba ar, ka Sohra Combine CC ka la jop da 8 wiket ïa ka Lumpaia Avengers CC. Ka Lumpaia Avengers ka la jied ban tied nyngkong ha kaba ka la ïoh 93 run bad shah pynhap 4 wiket ha ki 12 over. U Easterland Iangrat ka la tied 32 run na ki 36 bol. Katba u Kevin Diengdoh u la khur 2 wiket na ka bynta ka Sohra Combine.
Haba wan shimti ïa ka pali kaba ar, ka Sohra Combine ka la kynjoh sha ka thong da kaba kamai 94 run bad shah pynhap 2 wiket ha ki 12 over. U Donkyrmenlang Nadon u la tied 48 run na ki 31 bol. Katba u Ralphy Henrich Diengdoh u la khur shi wiket na ka bynta ka Lumpaia Avengers. Ïa ka nam Player of the Match la khur da u Donkyrmenlang Nadon.
