Ha ka jingiohi ngut nget jongnga ban wanrah ki aiñ ban ïada ia ka ri bad ka jaitbynriew ka long ba ym dei ban thaw ki aiñ ban khang ia ka kamai tih maw tih shyiap, pomdieng pomsiej bad kiwei kiwei. Namar kane ka long ka kam iap kam im ki briew ba im kamai jakpoh na ka mei mariang kumba u Blei u la buh.
Namar ki briew jongngngi kim lah ban im tang ha ka khaiï ka pateng ba bun ngim don lad bad ki don shibun ki jingduna ha ka ioh ka kot, namar ngi long ki briew kiba duk ngim lah ban ïaleh bad kiba heh spah. Lada khang noh ïa ki kam rit kam ria ka long ba ngi la shah khñiot beiñ ha kiba don ba em lane ki bor ka aiñ. Ka jingthmu ka sorkar (District Council) ban oh dor lane oh khajna noh ïa ka rukom shna ïing shna sem kan ktah ïa ki briew baduk.
Kiba riewspah te kim sngew ei ei lada shim katno-katne ruh. Hynrei ki baduk te ban shna ïing bha kim don lad shun lait sa tang ban shna ki ïing skum ne ïing phlang kum ha ki por mynshuwa. Namar ban shna ïing tin (Assam type) lane ïing dewbilat ka don ka jinglut kaba jur.
Sa ban hap ioh jingbit ban shna ïing ka la nang jakhom khait ïa ki barit ki bym don kamai-kajih kaba biang. Ki nongthaw aiñ ki dei ban don ka mynsiem sngewlem ïa ki baduk ym ban pyniaryngkat dor bad kiba riewspah ha kiba bun ki liang.
C. B. Iawphniaw
