Thiruvananthapuram, Lber:
Kum shi bynta ban pynpaw ïa ka jingsngew jong ki kynhun ba pawkhmat jong ki Muslim, ki nongïalam Congress ha ka jylla Kerala ki la buh da jingkyrpad ïa ka Election Commission (EC) ba kan khmih biang ha kaba ïadei bad ka tarik ban pynlong ïa ka ilekshon ha Kerala namar ba ka hap ha ka Sngi Thohdieng. Ha ka shithi ba la phah sha u Chief Election Commissioner of India, u Acting President jong ka Congress ha ka jylla u M M Hassan bad u nongïalam jong ka liang pyrshah u V D Satheesan u la buh ka jingkyrpad na ka bynta ban kylla noh ïa ka tarik na ka bynta ban pynlong ïa ka ilekshon, na kaba dei ban long ha ka 26 tarik, Ïaïong. Kane ka jingpyntreikam jong ka seng Congress ka la long halor ka jingkyrpad jong ki 19 tylli ki kynhun ba pawkhmat jong ki Muslim kiba la dawa ba la dei ban pynkylla noh ïa ka tarik ban pynlong ïa ka ilekshon ha katei ka sngi kum shi bynta ban pyrkhat na ka bynta ki riewngeit Muslim.
Kumba la ïohi hashwa, la ong ba ka kynhun nongïalam jong ka seng Congress ka i kum bym patiaw ha kaba ïadei bad ka jingkyrpad ban pynkynriah ïa ka tarik ban pynlong ïa ka ilekshon. Kim kwah ruh ban shah iehnoh haba ka kynhun nongïalam jong ka IUML ka la dep ban leit mih hakhmat ka EC ha kaba ïadei bad kane ka bynta. Ha ka email ba la phah sha CEC, u Hassan bad u Satheesan ki la pynpaw ïa ka jingdonkam ha kaba ïadei bad ka Sngi Thohdieng na ka bynta ka kynhun ki riewngeit Muslim. Ki la ong ba lada ïa ka ilekshon yn pynlong ha ka Sngi Thohdieng, baroh ki nongbud jong ki seng saiñ pyrthei, ki nongthep vote, kiba ngat ban trei ha ki jaka thep vote bad ki nongïarap kin sa ïakynduh jingeh shibun.
