Shillong, Lber 21
Ka Shillong Lajong FC kan pynkhreh ïa ka jingïakhun pyrshah ïa ka Inter Kashi ha ka lympung ïalehkai I-League ha ka Sngi Thohdieng ka ban long ha Kalyani Stadium, Kolkata ha ka por 7 baje janmiet.
Na ki ar tylli ki jingïalehkai ba la dep, ka Lajong ka la ïasam mar shi point hadien ba la ïakhaid mar 1-1 kol pyrshah ïa ka Real Kashmir bad ka Namdhari FC. Kumta kane ka kynhun ïalehkai na nongbah ka la ïai sah ha ka kyrdan ba hynriew lem bad 31 point na ki 20 sien ïakhun.
Kumba ka long mynta ka Lajong ka dangduna haduh 6 point ïa ka Inter Kashi kaba don ha ka kyrdan basan.
Na ka liang u coach ka kynhun u Bah Bobby L Nongbet u la pynpaw ïa ka jingkhmih lynti ba ka kynhun jong u kan ïalehkai bha na ka bynta ban ïoh ïa ki lai point namar ha ka wat kaba nyngkong (1st leg) ka la la shah rem ha katei ka kynhun kaba na Uttar Pradesh da 1-0 kol.
Ha kawei pat ka liang ka Shillong Lajong kan pynïalehkai da kawei pat ka kynhun (reserve team) na ka bynta ka jingïalehkai kaba nyngkong ha ka Shillong Premier League pyrshah ïa ka Langsning FC ka ban long ha kane kajuh ka sngi ha SSA Stadium, Polo.
