Shillong, Lber 21
U General Secretary ka United Democratic Party (UDP) Sengkmie, Bah Jemino Mawthoh, u la ong ba ka jingmih noh u President ka UDP Ri Bhoi District, Bah Donbok Khymdeit ryngkat katto-katne ki nongkitkam kan nym ktah ïa ka seng UDP namar ki dang bun ki nongkitkam bad ki nongkyrshan kiba dang sah ha ka seng.
U Bah Jemino u la ïathuh ba ki nongkitkam ka Ri Bhoi District kin sa wan ban ai jingpynshai sha ophis ka UDP ha Shillong ha ka Sngi Saitjaiñ hadien ba u President ka UDP Ri Bhoi, Bah Donbok Khymdeit u la mih noh ban leit pynïasoh sha ka seng NPP.
U la ong haba ka ilekshon ka la wan, ka ju long ka rukom bad ki nongkitkam na kawei ka seng sha kawei pat ki ju rung bad ju mih. Hynrei ka UDP ha kane ka ilekshon MP Lok Sabha kan khlaiñ bha namar ka don 12 ngut ki MLA bad 2 ngut na ka HSPDP kynthuplang bad ki MDC na JHADC bad KHADC.
Shuh shuh u la ong ba ka UDP mynta kan dang khlaiñ hapoh ka jingïalam u Bah Mayralborn Syiem uba dei u MLA ka Nongpoh bad Bah Balajied Rani uba dei u MDC.
“Kiwei ki seng ki lah ban kynthoh ïa ka UDP hynrei ki paidbah haduh mynta ki dang ieid ïa ka UDP namar dei tang kane ka seng riewlum kaba khlaiñ hapoh ka jylla” u la ong.
U Bah Jemino u la ïathuh haba ka UDP ka leit pynlong jingïalang ha Umroi mynta ka sngi kiba bun ki paidbah ki dang wan ban ai jingkyrshan.
U la pyntip ba mynta man ka sngi ka UDP ka la leit ban pynlong jingïalang sha man ki konstitwensi ban pynshai ïa ka nongrim jong ka seng halor ka ilekshon MP ryngkat u kyrtong ka RDA Bah Robertjune Kharjahrin.
U Bah Donbok Khymdeit ryngkat ki nongkitkam ka UDP kiba la mih noh kin sa rung sha ka seng NPP lashai ka Sngi Thohdieng ha Nongpoh.
