North East Games: Khur ka Jylla 32 tylli ki takma, mynta yn ïakhun final u ‘rang ïakura

Shillong, Lber 21

Ka Jylla ka la khur biang sa 3 tylli ki takma rupa bad 7 tylli ki takma rnong ha ka sngi kaba lai jong ka lympung ïalehkai 3rd North East Games kaba dangiaid shaphrang ha ka nongbah Kohima kaba ha Nagaland.

Haduh kane ka sngi, ka Jylla ka la khur haduh 32 tylli ki takma, kynthup ia 2 ki takma ksiar, 6 ki takma rupa lem bad 24 tylli ki takma rnong. Ha kane ka jingïaid lynti kaba lai sngi hapoh kane ka lympung, ka Rinalis Ingti bad ka Sibilda Maring ki la lah ban pynpaw ïa ka jingtbit ha ka High Jump wat hapdeng ka jingktieh ka madan na ka daw jong u slap.

Ha kane ka jingïakop ka Rinalis ka la khur ïa ka takma rupa hadien ba ka la lah ban kynthih ha ki 1.43 mitar, katba ka Sibilda ka la lah ban kynthih ha ki 1.35mitar na ka bynta ban khur ïa ka takma rnong.

Kumjuh u Skhemlang Suba u la khur ïa ka takma rupa bad u Eleven Dkhar uba la khur ia ka takma rnong ha ka jingïakop mareh kaba 800mts jong ki shynrang. U Primus Ronghi u la khur ïa ka takma rupa bad u Pringchang N. Sangma u la khur ïa ka takma rnong ha ka High Jump ki shynrang.

Sa shisian pat ka Glorify Kurbah ka la lah ban pynpaw ïa ka sap ïalehkai ba kyrpang ha kaba ka la lah ban khur biang ïa ka takma rnong sa ha ka jingïakop mareh kaba 800mts ki kynthei.

Ha ka jingïalehkai kynhun jong ka 4X400M Mixed Relay, ka Megha-aya ka la khur ïa ka takma rnong. Kane ka la wan lyngba u Donbok Sha-bong, Eleven Dkhar, ka Glorify Kurbah bad ka Ritina Hanse.

Ïa ki takma rnong la khur ruh na ka jingïalehkai Taekwondo lyngba u Mahi Karki ha ka kyrdan ialehkai jong ka 48kg bad ruh na ka Table Tennis lyngba u Prithvi Dey ha ka Men’s Singles.

Nalor kine ki jingialehkai, ka Jylla ka la thikna ruh ban khur takma ïa ka takma ksiar lane rupa sa na ka Boxing hadien ba uwei na ki rangïakua u Bhalang Shadap (67kg) u la khur jingjop ha ka semi final bad un pynkhreh ban ïakhun final ha ka Sngi Thohdieng.

Ha ka Badminton jong ka Men’s Doubles, ki ar ngut ki rangïalehkai ka Jylla kata u Chirag & Gitchiak ki la shah rem noh ha u Lalrinmawma & Laldintluanga Tlau kiba na Mizoram da 16-21; 14-21.

Ha ka Basketball, ka kynhun ki ‘thei ïalehkai ka Jylla ka la pynliem noh ïa ka Mizoram da 57-22 basket na ka bynta ban bat ïa ka kyrdan ba hakhlieh.