Agartala, Lber:
U Chief Electoral Officer (CEO) u Puneet Agarwal u la pyntip ba kumba la antad ba ki la don kumba 7000 ngut ki shipai pahara kiba la shah pyntreikam ha ka jylla na ka bynta ban pyntikna ban ïaid beit ïaid ryntih ïa ka ilekshon Lok Sabha ka ban sa long shen, ha kaba la khmih lynti ba nalor kine kin sa don shuh shuh kiwei pat ki ban shah pyntreikam.
Kum shi bynta ban batai shai sha ki nongthoh khubor, u CEO jong ka jylla u la ong ba baroh ki jaka thep vote ha ka jylla kin sa shah buh da ki CCTV Camera, bad kan sa don ka kor pyntreikam ha ka ban lah ban ïohi beit ïa ki rukom pyntreikam ha kaba ïadei bad ka jingthep vote, ka ban khmih bniah lyngba ka Control Room.
U la kular ba ki jingpyntreikam kin sa long da kaba laitluid bad kaba paw paidbah, kumjuh ban pynsuk bad ban pynïaid beit ïa ka ilekshon. Nalor kane, la ïathuh ba ka jingkhmih bniah ïa ki Electronic Voting Machine (EVM) la dep lypa. Shuh shuh u Agarwal u la ong ba la pyntikna ïa ki jaka na ka bynta ban pynlong ïa ki jingthep vote.
Ka jingthep vote na ka bynta ka Lok Sabha ilekshon ha Tripura West konstitwensi kan sa long ha ka 19 tarik, Ïaïong, ka ban long ryngkat bad ka ilekshon shiteng samoi ha Ramnagar Assembly konstitwensi. Kumjuh ka Tripura East konstitwensi kan sa pynlong ïa ka jingthep vote ha ka 26 tarik, Ïaïong.
Katkum ka jingïathuh jong u Agarwal, la ong ba ki la don baroh kumba 13.61 lak ngut ki nongthep vote ki ban sa ïashim bynta ha ka jingthep vote na ka bynta ka Tripura West Lok Sabha konstitwensi, katba 45,669 ngut ki nongthep vote kin sa ïashim bynta na ka bynta ka ilekshon shiteng samoi ha Ramnagar.
Shuh shuh la ong ba ka East Tripura konstitwensi kan sa sakhi ba kin sa don kumba 13.95 lak ngut ki nongthep vote. U Agarwal u la pynbna ruh ba la don shuh ki jaka thep vote ha ka thaiñ Kalagang jong ka Santirbazar ha Tripura, ha kaba ki poiwir Bru ki la ïoh jaka sah ha u Kyllalyngkot. Kumba ka long mynta, ka Tripura ka la don kumba 3349 tylli ki jaka thep vote kiba treikam.
