Shillong, Lber:
Ki ‘workshop’ halor ka deiriti jong ka sur kren bad ka jingkynnoh ïa ki kyntien ki dei kiba dang pynlong ha Akashvani, Jowai bad Akashvani, Shillong na ka bynta kito kiba pynmih ïa ki prokram ha ka ktien Jaiñtia & Khasi ha ka Akashvani bad Doordarshan.
Ka ‘workshop’ ba la pynlong ha Akashvani, Jowai na ka bynta ka ktien Jaiñtia, ka la long ha ka 20 tarik u Lber, 2024 bad ka ‘workshop’ na ka bynta ka ktien Khasi kan long ha Akashvani, Shillong ha ka 21 bad 22 tarik u Lber, 2024.
Ïa kine ki ‘workshop’ la pynlong da ka National Academy of Broadcasting & Multimedia, Delhi, ka jaka ai jinghikai ba halor tam jong ka Prasar Bharati, ka nongai khubor paidbah jong ka India ha ka jingïatreilang bad ka Regional Academy of Broadcasting & Multimedia, Shillong, ban ai jinghikai ïa ki nongpynmih ïa ki khubor jong ka Akashvani & Doordarshan ha ka ktien kaba ki ai jingkren khnang ban kyntiew ïa ka jingseisoh jong kane ka jingai khubor lyngba ka jingpyndonkam, ka jingkynnoh, ka jingthoh bad ka jingpynsawa ïa ki ktien ha ka rukom kaba dei.
Ka Akashvani ka dang bteng ban long ka jaka pdeng jong ki jingai jingkren bad ki jingthoh jong kane ka ri.
Ki ‘riewpawkhmat na Ri-lum Jaiñtia kum u Bah Rupaïa Lamar uba la shongthait kum u Principal jong ka CWSM College, Baghmara ha Ri-lum Garo, Dr. Waisa Sumer, Assistant Lecturer ka Jowai Government Girls’ Higher Secondary School bad u Bah Wansalan E. Dhar, Secretary ka Khasi Authors’ Society, West Jaiñtia Hills District Branch ki la ïashim bynta kum ki ‘riewshemphang ha ka ktien ka thylliej ha kane ka ‘workshop’ ba la pynlong halor ka ktien Jaiñtia.
Ha ka ‘workshop’ halor ka ktien Khasi yn wan ïashim bynta da ka Padmashree Kong Patricia Mukhim, Editor, ‘The Shillong Times’, Padmashree Dr. Badaplin War, ‘riewshemphang ha ka ktien ka thylliej, Prof. Streamlet Dkhar, Head of Khasi Department, NEHU, Dr. T. K. Bamon, VC, Martin Luther Christian University & Director barim ka EFLU, Shillong ha ryngkat u Bah Arkin Pariat bad ka Kong R. K. D. Budon, ki Programme Officer ba la shongthait jong ka Akashvani, Shillong lem bad Kong Basilica Nongpluh, Senior Announcer jong ka Akashvani, Shillong.
U Dr. Dipendra Kumar Mazumder, nonghikai na ka National Academy of Broadcasting & Multimedia, Delhi, & Jangkholal Gangte, Head of Programme jong ka RABM, Shillong ki ïashim bynta ha baroh artylli kine ki ‘workshop’ ha ryngkat u Head of Programme ka Akashvani Shillong & Jowai, North Eastern Service bad Doordarshan, Shillong.
