Shillong, Lber 21
Ka Shillong Lajong Football Club ka la long sa kawei pat ka kynhun kaba la jam sha ka final ha ka lympung ïalehkai E.K Mawlong Memorial Trophy 2023-24 ba la pynlong da ka Mawlasnai Sports Club.
Kane ka jinglah ban pynthikna ka la wan urlong hadien ba ka la lah ban pynliem noh ïa ka Kith United FC lyngba ka tie-breaker da 5-3 kol ha ka jingïakhun semi final (2nd leg) kaba la long ha ka Sngi Balang ha madan ïalehkai ka shnong Mawlasnai.
Wat la ha ka jingïakhun jong ka wat kaba nyngkong (1st leg) kaba la long kham ha shwa, ka Kith United ka la jop da 2-1 kol, hynrei ha kane ka jingïakhun jong ka wat kaba ar ka Lajong ka la thep da 1-0 kol bad haba kheiñ lang kine ki kynhun ki la ïakhaid mar 2-2 (aggregate).
Kumta na ka liang ki bor pynïaid ki la rai ban pynïashut da ka tie-breaker ha kaba ka Lajong ka la lah ban thep 5 kol, katba ka liang pyrshah ka la thep 3 kol.
Lyngba kane ka jingjop, ka Shillong Lajong kan pynkhreh ban ïaknieh ïa ka nam lahduh pyrshah ïa ka Beniris FC na Ri Bhoi District, kaba la jop ïa ka Ehrngiew da 3-0 kol. Ha ka wat kaba nyngkong ka Beniris ka la jop da 1-0 kol bad ha ka wat kaba ar ka la jop da 2-0 kol. Ïa ka tarik na ka bynta ka jingïakhun final yn sa pynbna shen da ki bor pynïaid.
