Bhubaneswar, Lber:
Ka sorkar ha Odisha, ha ka jingïalang ba la pynïaid da u Myntri Rangbah u Naveen Patnaik hadien ba ka la pdiang ïa ka skhim shna ïing ba la tip kum ka “Mo Ghara” ka la pynbna ban bteng ha ka jingpyntreikam kum shi bynta ban pynïoh ïing lut ïa ki nongshong shnong hapoh ka jylla.
Kane ka skhim ka don jingthmu na ka bynta ban ai jingïarap pisa sha ki longïing kiba duk kiba don ha ki thaiñ nongkyndong.
Ka skhim “Mo Ghara” kan sa lah ban treikam ha baroh ki longïing, kaba tam na ka jingpynshna ïa ki ïing naba ka la don ka jingpyrtreikam pyrkhing ne namar ka jingbym biang ka jingmang pisa, bad ruh na ka bynta kito kiba ïoh duna eh ka pisa ha ki por ba la leit bad kwah ban pynkha shuh shuh ïa ki ïing jong ki. Kane ka dei ka skhim shna ïing kaba ai jingmyntoi ha ryngkat ka jingïohnong na ka mang tyngka jong ka sorkar.
Hapoh ka jingtreikam jong kane ka skhim, ka la don ka jingthmu ban shna, ban pynheh bad ban pynkha kamra shuh shuh, ban pyndep pura ïa ki ïing, ki nongïoh myntoi ki lah ban ïoh jingmyntoi na ka ram shna ïing haduh T. 3 lak ha kaba yn sa lah ban siew biang ïa ka ha ki 10 snem lait noh shi snem ka jingsangeh ha ka ban siew ïa ka pisa ha ka dor kaba rit.
Ki lah ban jied kawei na ki saw tylli ki rukom siew ha kaba ïadei bad ka Loan, kata T. 1 lak, 1.5 lak, 2 lak bad 3 lak, la ong ka jingthoh kaba la wan na ka sorkar jylla.
Ki lad ai jingmyntoi ïa kiba la wanrah da ka sorkar na ka bynta ban ai jingmyntoi hapoh ka jingtreikam jong ka skhim kaba thymmai ka kynthup napdeng kiwei pat ka long da T. 25,000 ka jingai jingmyntoi sha ki longïing kiba dei ban ïoh jingmyntoi.
Ki longïing kiba sah ha ki ïing trep bad ki ïing bha kaba shi kamra kim pat ïoh jingïarap pisa eiei kaba palat ïa ka T. 70,000, ïa kaba la mang na ka bynta ka skhim kaba thymmai.
Ki la don kumba 4 lak ngut ki nongïoh myntoi ki ban shah kynthup ha kane ka skhim shna ïing kaba thymmai hapoh kajingmang jingïarap pisa kaba T. 2,150 klur ha ki ar snem ba la leit bad kane ka jingpyntreikam kan bteng.
