Shillong, Lber 21
U Ruturaj Gaikwad un mih bujli ha ka jaka u MS Dhoni kum u kapten ka Chennai Super Kings na ka bynta ka India Premier League 2024 bad kane ka la wan hadien ba u Gaikwad u la ïadon bynta lang ha ka jingïalang jong ki kapten na ka bynta kane ka lympung ïalehkai mynta u snem kaba la long ha ka sngi Palei ha Chennai.
U Dhoni u la shimti kum u kapten jong ka CSK naduh kaba sdang ka lympung ïalehkai IPL bad u la lah ban pynurlong ïa kane ka kynhun ban khur ïa ka nam lahduh haduh san sien.
U Gaikwad, uba la ïalehkai hynriew sien ha ka ODI bad 19 sien ha ka T20 na ka bynta ka India, u la ïoh ban ïalehkai nyngkong eh na ka bynta ka CSK ha u snem 2020 bad u la ïoh ruh ban mihkhmat ïa kane ka kynhun ïalehkai kaba la khur ïa ka lahduh haduh san sien ha ka IPL ha ki 52 sien ïakhun. Une u nongtied u la lah ban pynsah kynmaw ha ka jinglah ban kamai run ha u snem ba la lah da kaba kamai 590 run ha ki 16 sien ïakhun.
“U MS Dhoni u la aiti noh ïa ka jinglong kapten jong ka Chennai Super Kings sha u Ruturaj Gaikwad hashwa ban sdang ïa ka TATA IPL 2024. U Ruturaj u la long u rangïalehkai ba kynsai jong ka Chennai Super Kings naduh u snem 2019 bad u la ïalehkai 52 sien ha ka IPL,” la pynpaw ka kyrwoh na ka CSK da kaba ong ba ka kynhun ka la khmih lynti ban ïalehkai bha ha kane ka aïom.
U Dhoni u la lah ban pynpaw ïa ka jingtbit ha ka kam ïalehkai bad u la long u nongai myunsiem ïa ki rangïalehkai kiba hadien. Na ka kam kum u nonglum tiket ha ka railway station, u la lah ban pynkylladur ïalade ha ka kam ïalehkai kriket na ka bynta ka ri India ha kaba u la bat kum u kapten ha ka ICC T20 World Cup 2007, ICC Cricket World Cup 2011 bad ha ka ICC Champions Trophy 2013.
U Dhoni ula shimti ruh kum u kapten ka CSK na ka bynta ban pynurlong ban khur ïa ka nam lahduh haduh san sien ha ka IPL kaba la long ha u snem 2010, 2011, 2018, 2021 bad 2023. U Dhoni u la lah ban ruh ban pynurlong ïa ka CSK ban khur ïa ka nam lahduh ar sien ha ka CLT20 ha u 2010 bad 2014.
Une u khlur nongtied u la ïalehkai haduh 250 sien ha ka IPL, kine ki long na ka bynta ka CSK bad ïa ka Rising Pune Supergiant naduh u 2016 haduh u 2017. Ha kine ki jingïalehkai, u Dhoni u la lah ban kamai 5,082 run. U la lah ruh ban khur ïa ka shiteng shah kaba 24 sien ha kane ka lympung ïalehkai. U la lah ban ruh ban khur haduh 142 sien bad pyndei ïa u stump haduh 42 sien.
Kumta ka CSK kan pynkhreh ïa ka jingïalehkai kaba nyngkong pyrshah ïa ka Royal Challengers Bengaluru ha ka IPL 2024 ka ban long ha ka Sngi Thohdieng ha Chennai.
