Nongstoiñ, Lber 22
Ki nia bad ki jutang na ki seng saiñ pyrthei ki la ïai mih na kawei ka sngi sha kawei pat ban ïalap sha ki paidbah nongshong shnong da kaba ïa kam ba kata ka seng lane u kyrtong jong ka u long uba biang bad jong kiwei kim biang kum shi bynta ban pynkhreh ïa ka ilekshon MP sha ka Lok Sabha.
Ïa kane la sakhi ruh ha ka Sngi Thohdieng ha Ïew Mawlangsu ha kaba ki ar tylli ki seng saiñ pyrthei ba kynthup ïa ka kynhun jong ka Voice of the People Party (VPP) bad ka kynhun jong ka RDA ki la ïeng ha kajuh ka rynsan ban ïalap bad pynshai ïa ki nongrim jong ki na ka bynta ka thong sha kane ka ilekshon.
Ka VPP kaba shim ïa ka bynta kaba nyngkong ban pynshai ïa ki nongrim ka seng, ki nongkren ki kynthup ïa u Bah Ardent M. Basaïawmoit kum President ka VPP, u samla Marbud Dkhar, Bah Powell Sohklet, Organising Secretary ka VPP Mawthadraishan ha ka jingdonlang kiwei-kiwei de ki ‘riew rangbah.
U Bah Basaïawmoit u la ong ba ha ka por ilekshon la die ïa ka lawei ki khun, namarkata ka daw ka la dei ka por ban kyndit bynriew.
U la ong ruh ba kito kiba jied ïa u briew lane ïa ka briew kaba ai pisa, kam dei ka jingjied, ka dei ka jingshah thied.
Haba shim pat ïa ka bynta ka ba-ar ban ai jingkren, ka kynhun jong ka RDA ba kynthup ïa ka HSPDP bad UDP, ki nongkren ki kynthup ïa u Bah Robertjune Kharjahrin, kyrtong ka RDA, u Bah Metbah Lyngdoh, President ka seng UDP, u Bah K.P. Pangniang, President ka HSPDP ha ka jingdonlang kiwei-kiwei ki ‘riew rangbah.
U Bah Metbah Lyngdoh ha kajuh ka por kum u Chairman ka RDA u la ong ba ka por ilekshon kam dei ka por tamasa ka por ïa ka ban pynshongshit kulmar kam dei ka por ban ïalam bakla ïa ki paidbah ha ki jingïalap jong ki tang na ka bynta ban pynsngew ïa u paidbah ba un sngew ban ïoh ïa ka jingkyrshan.
U Bah Robertjune Kharjahrin, kyrtong ka kynhun RDA u la ong ba kan myntoi aïu ban ïoh ïa ka dud bad ka ngap lada duh noh wat tang ïa ka hok ban mane laitluid, ka hok ban mane blei laitluid – ka hok ban mane blei laitluid ka long ka hok longbriew manbriew ka long ka hok ba la ai da ka riti synshar treikam jong ka Ri India “ka dei ka kamram ka jong nga ka jong phi ban ïada bad pynneh-pynsah ïa ka.”
“Ka kynhun RDA ka kular hakhmat ki paidbah nongshong shnong ba lada phi ibit ïa ngi ban long kum u nongmihkhmat ïa ka jingangnud jong phi, ngin ïeng ban kren hapoh ka dorbar bah Parliament bad hangno-hangno ki jaka ba donkam ban kren na ka bynta ban pynneh ïa ka hok ban pynïoh mane blei laitluid,” la ong u Bah Robertjune.
U Bah Robertjune u la ong ruh sa kawei ka mat ïa kaba u don ban tyrwa sha ki paidbah ka long ba na ka liang jong ka kynhun ka don ïa ka jingangnud bad ka jingkitkhlieh ban pynneh-pynsah ïa ka riti ka dustur bad ïa ki snap kiba kyrpang jong ka jaidbynriew.
U la kyntu ïa ki paidbah ba kin jied ïa ka kynhun RDA ban mihkhmat ïa ka sur u paidbah ha dorbar bah Parliament bad kular ban ai ïa ka jingshakri kaba bha kaba janai na ka bynta ki paidbah.
“Sngewbha jied ïa ngi ha kane ka por kaba mynta, ka HSPDP ka la shakri ïa phi, kam shym la shet kylla bad kam shym la kylla ïa ka nongrim jong ka, ka UDP kam shym la pat shet kylla, ka la ïeng halor ka nongrim ban shakri lyngba ki bun tylli ki snem. Jied mynta, ngin dang long kajuh ka seng ka ban mihkhmat ïa ka sur ïa ka jingangnud jong phi ngin ïeng ban ïada ïa ka Ri bad ka Jaidbynriew. Ngin ïeng ban ïada ban pynneh-pynsah ïa ki snap kiba kyrpang jong ngi, ngin ïeng ruh ban kyntiew ïa ka ri bad ka jaidbynriew ka jong ngi ha ki liang baroh, leit ha ki ïing ki sem pynshong nongrim pyrkhat bha,” u la ong.
U Bah Robertjune u la ong ruh, “Lada phi ibit ïa nga, ngan buh ïa ka mat kaba hakhmat eh ban ïakren bad ka Sorkar India ban pynbeit noh ïa u pud u sam.”
