Shillong, Lber 22
Ka Shillong Lajong FC ha ka sien ba ar ka la mad biang ïa ka nam rem ha ka Inter Kashi ha ka lympung ïalehkai I-League da 2-1 kol ha ka Sngi Thohdieng ha Kalyani Stadium, Kolkata.
Kane ka nam jop jong katei ka kynhun kaba na Utter Pradesh ka la wan urlong lyngba u Mario Barco bad u Tejas Krishna na ka bynta ban kamai ïa ki lai point.
Ha kane ka jingïakhun baroh ar kynhun ki la pyrshang ban ïakhun tyngeh naduh kaba sdang. Hadien shiteng kynta ka Inter Kashi kaba la khur jingjop ha ka wat kaba nyngkong da 1-0 kol, ka la ïoh ban pynkhih jar nyngkong eh lyngba Mario Barco ha ka minit kaba 31. Kane ka kynhun ka la pynbud biang ïa ka kol kaba ar lyngba u Tejas Krishna ha ka mnint kaba 45 na ka bynta ban tam da 2-0 kol ha ka kylla step.
Hadien katto-katne por ba la bteng ïa ka jingïakhun jong ka kylla miet, ka Lajong hapoh ka jingïalam u Bah Bobby L. Nongbet ka la lah ban pynphai kylla lyngba ka penalty ba la shut da u Renan Paulino ha ka minit kaba 54.
Wat la ka Lajong ka la ïakhun tyngeh na ka bynta ban ïoh thep kol, hynrei kam shym lah shuh ban pynphai bad ka la mad ïa ka jingshah rem. Kumta ha shwa ban wai artad ka jingïalehkai u Ronney Wilson Kharbudon u la shah sei syndon da ka red card bad kane ka mut ba une u rangïalehkai un duh ïalehkai ha ka jingïakhun ka ban wan.
Lyngba kane ka jingjop ka Inter Kashi ka la kiew sha ka kyrdan balai lem bad 39 point, katba ka Lajong ka la ïai sah ha ka kyrdan ba hynriew bad 31 point na ki 21 sien ïakhun.
Te kumta ka Lajong kan leit sha Delhi na ka bynta ban pynkhreh ïa ka jingïakhun pyrshah ïa ka Delhi FC ha ka 28 tarik mynta u bnai.
