Shillong, Lber 22
Ki pulit ka South Garo Hills ki la ïoh ban pyllait im ïa uwei u nongshong shnong ka Uttar Pradesh, u Akhilesh Singh Chauhan, uba la wan trei surok sha kane ka thaiñ.
Ha u kyrwoh khubor ha ka Sngi Thohdieng, u SP ka South Garo Hills, u Shailendra Bamaniya, u la ong ba ha ka 20 tarik Lber, la ïoh jingtip ha thanat Siju ba uwei u briew ba la tip kyrteng kum u Akhilesh Singh Chauhan, u la shah rahbor na ka jaka sah jong ki nongtrei surok kaba don ha Rongdik Bridge, Karukol. Kine ki nongtrei ki dei na kawei ka kompani kaba dang pyntrei surok bad jingkieng ha ki thaiñ South Garo Hills.
Hadien ba la ïoh ïa katei ka khubor, na ka liang ki pulit ki la sdang ban pynlong da ka jingthwet ha kiba bun ki jaka ha South Garo Hills. U SP u la ong ba ha ka sngi kaba bud, kata, ka 21 tarik Lber, ki nongrahbor ïa u Chauhan ki la kren bad ki bahaïing hasem bad kumjuh ruh bad u Manager jong ka kompani ha kaba ki la dawa ba dei ban siew T.50 lak hapoh lai sngi lym kumta kin shim noh ïa ka jingim jong utei uba shah rahbor.
Shuh shuh u SP u la ong ba ha ka jingtohkit bad ha ka jingthwet, la lap ba ki don saw ngut ki briew kiba la donkti ha katei ka kam. Kine ki kynthup ïa u Wilban M Sangma, 30 snem, u Withmil S Marak, 29 snem, u Lathin M Sangma, bad u Rongsrang M Sangma. Kine baroh saw ngut ki dei na ki shong kiba don ha South Garo Hills.
Hadien ba la ïoh jingtip halor kitei saw ngut, ki pulit ha ka Sngi Thohdieng ki la leit khynra ha ka shnong Upper Dasogre, bad na kane ka jaka, ki la ïoh ban pyllait im ïa utei briew uba la shah rahbor. Nalorkata, u SP u la ong ba ki bahaïing hasem bad ka kompani ki khlem siew wat tang shi naïa ruh sha kitei ki nongrahbor, bad ha kajuh ka por, ki la ïoh kem ïa arngut ki nongrahbor ba kynthup ïa u Wilban M Sangma bad u Withmil S Marak.
Ha ka jingkhynra, la ïoh ban kurup ruh ïa kawei ka suloi ba la shna hi bad artylli ki Mobile Phone. U SP u la ong ba kitei nongrahbor ki la don bynta bad ki kynhun lehnoh kiba mynshwa bad kiba treikam ha South Garo Hills.
