Hapdeng ka jingap khmih lynti lano ka seng Bharatiya Janata Party (BJP) kan pynbna ïa ki kyrtong na ka bynta ka ilekshon MP Lok Sabha, ki heh nongïalam jong kane ka seng kaba synshar ïa ka Ri ki la pynbna pynban ba ka seng kan ym pynïakhun ïano-ïano bad yn kyrshan ïa ki kyrtong ka National People’s Party (NPP) na Shillong bad Tura Parliamentary Constituency. Shisien peit, kane ka long kum ka jingsiew kylliang jong ka BJP ïa ka NPP hadien ba ka NPP ka la pynbna ba kan kyrshan ïa ki kyrtong ka BJP ha ki artylli ki konstitwensi ha Arunachal Pradesh ba kynthup ïa u Myntri Sorkar Pdeng, u Kiren Rijiju, bad sa uwei pat u MP, u Tapir Gao. Ha kajuh ka por, ngim sngewphylla ïa kane ka jingpynbna jong ka BJP namar ka NPP ka don lang ha ka shatri jong ka National Democratic Alliance (NDA) bad ka North East Democratic Alliance (NEDA), bad nalorkata, kine ki seng ki ïatreilang ha ka sorkar Meghalaya Democratic Alliance (MDA) naduh u snem 2018 bad haduh mynta hapoh ka jingïalam jong ka NPP.
Khlem pep, kane ka rai jong ki heh ka BJP na Delhi ka la pynjew slew ïa kito kiba la wan shakhmat ban pan tiket ban ïakhun na Shillong bad Tura. Sngewsynei ruh lada pyrkhat ïa kito ki kyrtong kiba la pynkhreh ïalade naduh ki khyndiat bnai ba la lah tangba kin hap ban kohnguh ïa kaei kaba la rai da ki heh ka seng watla ki don ka lynti ban mih noh na ka BJP bad ban ïakhun kum ki kyrtong shimet ne ban kyrshan noh ïa kiwei pat ki kyrtong kiba la don lypa. Ka jingkylli pat ba ngi kwah ban buh ka long ba hato ka BJP ha Meghalaya kan kyrshan shisha ïa ki arngut ki kyrtong ka NPP? Haba phai sha ka ilekshon MLA kaba la long ha u snem 2023, ka BJP ka la pynïeng kyrtong ha baroh 60 tylli ki konstitwensi, bad haba kheiñ kyllum, ka jingïoh ‘vote’ jong kane ka seng ka long 1,73,083 katba ka NPP, kaba la pynïakhun ha ki 57 tylli ki konstitwensi, ka la ïoh 5,97,595 ‘vote’. Hynrei, ka BJP ka la jop tang arngut ki MLA katba ka NPP ka la jop 26 ngut ki MLA.
Hynrei, ka rukom thep ‘vote’ ha ka ilekshon MP bad MLA ka kham ïapher. Ngin hap ban ïa peit bad ïa ap la ki nongïalam ka BJP ha Meghalaya kin kyrshan shisha ne em ïa ka Kong M Ampareen Lyngdoh bad ka Agatha K Sangma ha kane ka ilekshon. Ki la ju don ki khep ba wat hadien ba ki heh nongïalam ka seng ki la bthah ban kyrshan, ki nongtrei jong ka seng ha kano-kano ka jylla ki ïaid lait na kata bad ki jied ïa ka lynti kaba ki sngewbit lane ki mih noh syndon na ka seng ban ïakhun ïa ka ilekshon. Lehse kaba kum kane ka lah ban jia ha Meghalaya ruh bad lehse ka lah ruh ban ym jia. Ka por kan sa batai ïa kiei-kiei.
Ha ka ilekshon ha u snem 2019, na ka Shillong Parliamentary Constituency, u Bah Vincent H Pala na ka Congress, u la long u lahduh ha kaba u la tam da haduh 1,52,443 ‘vote’ ïa u kyrtong uba wan ba ar na ka seng United Democratic Party (UDP), u Bah Jemino Mawthoh, katba na Tura, ka Agatha K Sangma na ka NPP ka la jop bad ka la tam da 64,030 ‘vote’ ïa u kyrtong ka seng Congress uba la wan ba ar, u Dr Mukul M Sangma. Ha kato ka ilekshon, u kyrtong ka BJP na Shillong, u Bah Sanbor Shullai, u la ïoh kumba 75,790 ‘vote’ katba u Rikman G Momin na Tura, u la ïoh tang 31,384 ‘vote’. Kane ka pyni ba ka BJP kam pat lah ban ïoh jingshaniah na ki paidbah watla ka la jop kput ha ka ilekshon MP ha u snem 2014 bad 2019.
Tangba man ka ilekshon kam long kumjuh. Mynta kito kiba kwah ban kyrshan ïa ka BJP kin hap ban pyrkhat thymmai noh ïano kin kyrshan hadien ba la rai ba kane ka seng kan ym pynïeng kyrtong na Shillong bad Tura. Lehse kan long ka jingduhnong ïa ka BJP namar kan ym lah ban thew ne tynjuh katno ka khlaiñ bad ka tlot. Yn ym lah ruh ban ong ba tang namar ba ka BJP ka khlem pynïeng kyrtong, baroh ki nongkyrshan jong ka kin leit kyrshan noh ïa ki kyrtong ka NPP. Ki lah ban ym leit thep ‘vote’ ne ki lah ban ai jingkyrshan shawei watla kin don ki ban thep ha ka shap jong ka NPP ha Shillong bad Tura. Namarkata, ka lah ban don ka jingsaphret jong ki ‘vote’ ka BJP ha kane ka ilekshon. Lehse kin dei ki nongkyrshan ka BJP ki ban rai mano ki ban jop bad mano ki ban wan ba ar ha kane ka ilekshon MP ba mynta ha Shillong bad Tura, bad kan shong ruh sa ha ki kyrtong na kiwei pat ki seng saiñpyrthei ha kano ka dur kin tan ïe ki nongkyrshan ka BJP sha ki lada kim sngewmon ïa ki kyrtong ba pynïeng da ka NPP. Ka por kan sa batai shai ïa kiei-kiei. Ngin ïa ap bad peit kaei ka ban jia ha kine ki sngi hashwa ka 19 tarik Ïaïong kaba dei ka sngi ban rai mano ban long MP na Shillong bad Tura.
