Shillong, Lber 22
Kawei na ki kyrtong ha ka ilekshon sha Ïingdorbar Lok Sabha, ka Kong Ampareen Lyngdoh ka dei kawei na ki MLA bad Myntri Sorkar kaba la ïaid kham jrong ka lynti ha ka saiñ pyrthei.
Ka Kong Ampareen ka la mih ban ïakhun nyngkong eh ïa ka ilekshon MLA ha u snem 2008, bad ka la jop khlem pat rem haduh mynta. Mynta ngin ïa khmih ïa ka lynti ïaid jong kane ka longkmie ha ka saiñ pyrthei ha kaba ka la ïakhun bun tylli ki ilekshon MLA.
Ilekshon MLA, 2008: Ka Kong Ampareen ka la mih ban ïakhun ïa ka ilekshon kaba nyngkong eh jong ka ha ka ilekshon MLA, 2008 na Laitumkhrah konstitwensi kum ka kyrtong jong United Democratic Party (UDP) bad ka la ïoh jingjop kum ka MLA. U hynmen jong ka, u Bah Robert Garnette Lyngdoh uba dei u MLA ka Laitumkhrah konstitwensi ha kato ka por, u khlem mih ban ïakhun ïa ka ilekshon MLA na ka Congress bad u la pynïakhun da uwei pat u kyrtong.
Ilekshon MLA shiteng samoi, 2009: Ka Kong Ampareen ka la iehnoh kam kum ka MLA bad mih noh na ka UDP tang hadien katto-katne ba khyllem noh ka Sorkar Meghalaya Progressive Alliance (MPA) kaba ïalam da u Dr. Donkupar Roy tang hapoh shisnem. Ynda la iehnoh kam ka Kong Ampareen kum ka MLA, la hap ban pynlong ïa ka ilekshon shiteng samoi na Laitumkhrah konstitwensi ha u snem 2009. Hadien ba la mih na ka UDP, ka Kong Ampareen ka la rung sha ka Congress bad ka Sorkar Congress ha kato ka por, ka la pynrung syndon ïa ka kum ka Myntri Sorkar wat lada kam dei ka MLA. Kum ka Myntri Sorkar, ka Kong Ampareen ka la ïakhun ruh kum ka kyrtong ka Congress ha ka ilekshon MLA shiteng samoi na Laitumkhrah konstitwensi ha u snem 2009 bad ka la shahjied biang kum ka MLA.
Ilekshon MLA, 2013: Ka Kong Ampareen ka la ïakhun biang ïa ka ilekshon MLA ha u snem 2013 kaba dei ruh ka ilekshon ha ka sien balai. Ka la ïakhun kum ka kyrtong jong ka Congress na East Shillong konstitwensi hadien ba ka Election Commission of India (ECI) ka la pyntreikam ïa ka jingpynbeit thymmai ïa ki konstitwensi ha kane ka Jylla ha kaba ka Laitumkhrah konstitwensi ka la duh noh. Ha ka ilekshon MLA 2013 ruh, ka Kong Ampareen ka la ïakhun kum ka Myntri Sorkar bad ka la shahjied biang kum ka MLA na kane ka konstitwensi kaba thymmai.
Ilekshon MLA, 2018: Ka Kong Ampareen kum ka Myntri Sorkar jong ka Sorkar Congress ka la ïakhun ïa ka ilekshon ha ka sien basaw na East Shillong konstitwensi, ha kaba ka la ïakhun kum ka kyrtong ka Congress ha ka ilekshon MLA 2018 bad ka la shahjied biang. Hynrei ha u snem 2018, ka Congress ka khlem ïoh ban thaw Sorkar bad shong sha ka Liang Pyrshah. Kumta ka Kong Ampareen ka la donlang sha ka Liang Pyrshah bad shisnem shwa ka ilekshon MLA 2023, ka Kong Ampareen lem bad 4 ngut kiwei pat ki MLA ka ai jingkyrshan ïa ka Sorkar MDA haduh ban da poi ka ilekshon.
Ilekshon MLA, 2023: Hadien ba la ai jingkyrshan ïa ka Sorkar MDA kaba ïalam da ka NPP, ka Kong Ampareen ka la pynïasoh noh bad ka NPP bad ïakhun ruh ïa ka ilekshon ha ka sien basan na East Shillong ha kaba ka la shahjied kum ka MLA bad ïoh long ruh ka Myntri Sorkar mynta hapoh ka Sorkar MDA-II.
Ilekshon MP, 2024: Kum ka kyrtong ha kane ka ilekshon MP sha Ïingdorbar Lok Sabha, ka Kong Ampareen kan ïakhun ïa ka ilekshon kaba hynriew ha ka jingïaid lynti jong ka kum ka nongmihkhmat paidbah. Ka Kong Ampareen kan ïakhun ïa ka ilekshon kum ka Myntri Sorkar bad lada ka shahjied kum ka MP, kan hap iehnoh ïa ka jinglong Myntri bad jinglong MLA.
