Shillong, Lber 22
Ka Hynñiewtrep National Liberation Council (HNLC) ka la kam ba ka la pynithuh ïa u briew uba donkti ha ka ban pynïap ïa u General Secretary barim ka seng, Bah Cherishstarfield Thangkhiew bad byrngem ruh ban pynshitom da kaba khrai-khlieh ïa u.
“Ngi la pynithuh ïa u briew uba donkti ha ka ban pynïap ïa u Bah Che. U pulit ophisar uba donkti halor ka jingïap u Bah Cherish un sa mad ïa ki jingpynsaja. Kyrmen skhem, ngin sa lap ïa phi, pynshitom ïa phi, bad khrai-khlieh ïa phi,” la ong u General Secretary-cum-Publicity Secretary ka HNLC, Bah Saiñ-kupar Nongtraw ha ka kyrwoh khubor.
Ha kawei ka liang, u la ong ba ka seng ka kyndit ban lap ïa ka jingkam ka tnad pulit haba ïadei bad ka sur kaba ka ïoh ring (kaba la kynnoh) jong uwei na ki suba HNLC uba la shah kem, uba ïakren bad u Military Commander ka seng, u Sanbor Pala, ïa kaba ka tnad pulit mynta da lade ka kylla ktien.
“Hato ka tnad pulit mynta ka kdew ba u Cherishstarfield Thangkhiew (Bam Kwai ha Dwar U Blei) u lah ban dang im? Katno ngut ki briew ba lui-lui kin khyllem ha ki ktang suloi jong ka tnad pulit ka Meghalaya tang namarba suba ïa ki, ba ki dei u Sanbor Pala? Mano ban dei hadien kane? Hato kin phai khmat sa sha ki nongïalam sengbhalang tang namar ka jingsuba ba dei u Sanbor Pala? Lada jia ba ki ïoh kem ïa u Sanbor Pala (ba shisha), ngin ym don kano-kano ka jingïada ban kyntait ba dei ma u. Shu peit kumno ki la kem bakla ïa u Bah Tarzan Lymba halor ka jingsuba donkti jong u haba ïadei bad ka jingpynbthei bom IED,” la ong u Bah Nongtraw.
U la ong ruh ba katkum ka kaiphod (judicial) jong u snem 2022 hapoh ka jingïalam u Justice (Retired) T. Vaiphei, ki pulit ki la kam bad kynnoh ba u Bah Cherishstarfield Thangkhiew @ Sanbor Pala, u don bynta ha ki kam dawa pisa bad jingpynbthei bom IED.
“Kane ka jinglong-jingman ka la ïalam sha ki 2 tylli ki bynta: ka jingbym larkam ha ki bor syntiat ki pulit bad ka jingthok ïa ki paidbah, kynhun sengbhalang, bad ka longïing u Bah Thangkhiew, ba u Bah Cherishstarfield Thangkhiew u dei u Sanbor Pala bad u treikam hapoh jong kane ka kyrteng,” u la ong.
Ha kajuh ka por, u la kynnoh ba ka jingpynïap ïa u Bah Cherishstarfield Thangkhiew kaba la kynnoh ba dei ha ka rukom kaba la thmu lypa, la ngeit ba ka dei ka jingïasylla saiñ pyrthei ba kynthup ïa katto-katne ngut ki Myntri hapoh ka Sorkar MDA.
Halor ka jingkam ba ka HNLC ka ïalam bakla bad khring ïa ki samla, u Bah Nongtraw u la ong, “La ju sakhi ba ka Sorkar Jylla bad Sorkar Pdeng ki ju ai buskit ïa ki ophisar ba bat aiñ bad shipai kiba don bynta ha ka ban leh donbor, pynsaja, pynïap bad thep along ïa ki nongïalam trai-ri bad ki ‘riew paidbah ba lui-lui da ka pisa, jingkiew kyrdan, ‘ribbon’, takma, lem bad kiwei-kiwei ki jingpynkup khusnam. Ki samla ka Hynñiewtrep ki don hok ruh ban ïoh buskit na ka jaidbynriew jong ngi ne ka HNLC lada ki ïakhun bad rat dyngkhong ïa ki nonghiar thma bad kiba ban beiñ, kiba buh jingma ïa ki briew jong ngi bad ka ri jong ngi.”
Ka HNLC ka ai jingïaroh ïa ki samla halor ka jinglong kloi ban aiti ïalade na bynta ka jaidbynriew naba ki ïapher bak-ly-bak na ki pulit, kiba i kumba ki buh hakhmat ïa ka bha ka miat jong ki bar-jylla.
Shuh shuh u la bynrap, “Kiba bun ki ophisar pulit kiba dei ki Khasi ha ka tnad pulit kum ka Claudia Lyngwa bad Vivek Syiem, la ñiew kum ki ophisar kiba rieh tngen ïa ki jinglong ba shisha jong ki hapoh ka jaidbynriew Hynñiewtrep.”
