Shillong, Lber 22
Ka Kong Ampareen Lyngdoh kaba dei ka kyrtong jong ka National People’s Party (NPP) ban ïakhun ïa ka ilekshon MP sha Lok Sabha na Shillong konstitwensi ka la ong ba lada ki paidbah ki jied ïa ka ha kane ka ilekshon kan dei ka longkmie kaba nyngkong na Shillong ba kan leit sha dorbar Parliament ha Delhi.
Haba ïakren bad ki nongthoh khubor hadien ba la dep thep kyrteng hakhmat u Returning Officer ha shlem treikam Deputy Commissioner, East Khasi Hills District, ka Kong Ampareen ka la ong ba ha ka jingïalehkai phutbol hap don ki nongïakhun pyrshah, hynrei ka seng NPP ka la dep sei ïa ki nongkitkam bad ki nongkyrshan kiba kynsai ban pynkhlaiñ ïa kane ka ilekshon.
Ka Kong Ampareen kam treh shuh ban kynthoh ïa kiwei ki seng saiñ-pyrthei haba kylli halor ka jingkynthoh ki nongïalam ka NPP ïa ka Voice of the People Party (VPP) ha kane ka ilekshon, hynrei ka ïeng ha ka nongrim ban pan jingkyrshan na ki paidbah.
Kumta ka la kyrpad ïa ki paidbah ba kin jied ïa ka ha kane ka ilekshon MP namar kan sa leh eiei ïa ki jingeh jong ki paidbah ka jylla, namar kan dei ruh ka sien kaba nyngkong ba ka longkmie na Shillong ban leit ha Parliament.
Nalor nangta, ka la ïathuh ruh ba ka la leit ban ïuh-kjat sha baroh 36 tylli ki konstitwensi ban ïakynduh ïa ki nongkitkam ka seng NPP, ban ïakynduh ïa ki khlieh nongsynshar, ki rangbah shnong, ki sengbhalang, ki nongïalam niam bapher-bapher. Namar kata, ka la ong ba lada ka shah jied kan leit sha Delhi, kan pynsngew ba dei ban mang pisa khambun ban shna ïa ki surok, ban pynbiang ïa ki lad pynïasoh ha ki nongkyndong, nangta ban pynpoi lut ïa ki tyndong lyer shet ha ki nongkyndong. Haba ïadei bad ka Citizenship Amendment Act, ka Kong Ampareen ka la pyntikna ba ha Meghalaya kan nym treikam.
Ha kane ka sngi thep kyrteng, ka Kong Ampareen Lyngdoh ryngkat ka jingsynranlang u kurim Bah Fantin Lakadong, bahaïing hasem ka la mih ryngkat bad ki nongkyrshan na ïing sah ha Laitumkhrah ban ïaid da ka kjat sha shlem treikam ka NPP kaba don ha Lachumiere. Hangne la ap lypa ki nongkitkam ka NPP naduh u Bah Prestone Tynsong uba dei President ka NPP Meghalaya Unit kynthup naduh ki MLA, MDC, ki nongkitkam bapher-bapher naduh ki samla bad ki longkmie.
Ha shwa ban leit thep kyrteng la pynlong ka jingduwai ha phyllaw ka shlem treikam NPP ba la duwai da u Bah Ransom Sutnga bad la ai syntiew ïa ka Kong Ampareen da u Bah Prestone Tynsong. Nangne ki la sdang ïaid kjat ter ter sha shlem treikam PHE, MBOSE, hakhmat ka ïing sah u Lat ka jylla bad poi sha shlem treikam Deputy Commissioner, East Khasi Hills District.
