Shillong, Lber 22
Ha ka lympung ïalehkai 3rd North East Games 2024 kaba la jan poi artad sha kaba kut ha Kohima,ka Manipur ka la ïoh ban knieh noh na ka Nagaland ïa ka kyrdan ba hakhlieh, katba ka Meghalaya ka la hiar sha ka kyrdan ba hynriew napdeng ki jylla jong ka thaiñ shatei lammihngi.
Haduh ka sngi kaba saw jong kane ka lympung, ki nongïalehkai ka Manipur ki la lah ban pynpaw ïa ka jingtbit ha baroh ki jingïalehkai ha kaba ka la lah ban tam tang kawei ka takma ksiar na ka bynta ban bat ïa ka kyrdan ba hakhlieh. Kane ka mut ba ka Manipur ka la khur 32 tylli ki takma ksiar, 22 ki rupa bad 24 ki takma rnong bad haba kheiñ lang baroh ka la khur 78 tylli ki takma.
Hynrei haba kheiñ ïa ka jinglah ban kamai ïa baroh ki takma, ka Nagaland ka la lah ban khur haduh 81 tylli ki takma. Kine ki kynthup ïa 31 ki takma ksiar, 22 ki rupa bad 28 ki rnong.
Ha kawei pat ka liang ka Assam ka la wan ha ka kyrdan balai da kaba kamai 94 tylli ki takma, kynthup ïa 29 ki takma ksiar, 33 ki rupa lem bad 32 ki rnong.
Haba phai sha ka Meghalaya kaba la ïoh ban bat ïa ka kyrdan ba hynriew, ka la kamai 45 tylli ki takma, kiba kynthup ïa 2 tylli ki takma ksiar, 7 ki rupa bad 36 tylli ki rnong.
Kane ka lympung kan poi sha kaba kut ha ka sngi Saitjaiñ bad sa tang katto katne ki jingïalehkai kiba dangsah hashwa ban pynkut noh ïa ka.
