Beirut, Lber:
Katkum ki khubor la ong ba u heh nongialam jong ka Hezbollah u la leit ban her sha United Arab Emirates ha ka jingleit khmih jong u ban ioh leit pyllait ia ki bun ngut ki nong Lebanon kiba la shah bat la slem ha katei ka ri.
Katei ka jingleit khmih jong utei u nong-ialam ka Hezbollah sha UAE ka long ruh kum ka jingplie lad ia ka jingiasuk hapdeng katei ka ri bad ka Lebanon namar la slem kitei ki ri kim da don jingiadei shuh khamtam haba iadei bad kitei ki jaitbynriew Shi’ite Muslim Hezbollah bad ki Sunni Muslim UAE, kaba long ka ri kaba ju iatrei lang bha bad ka United States.
Ia mynta hi, na ka liang jong ka tnat kam bar ri ka UAE kam pat shym la pynpaw pyrthei eiei shaphang katei ka jingleit khmih jong utei u heh ka Hezbollah sha UAE bad kam shym la kren eiei ruh wat haba la don kiba buh jingkylli halor ka jingiadei kam jong ki ha kane ka sien.
Uwei na ki nongthoh khubor na UAE haba ai jingkren ha katei ka sngi ka jingleit poi jong utei u heh na Lebanon sha katei ka ri, u la ong ba katei ka jingleit jurip jong u heh ka Hezbollah ha kane ka sien ka long ruh ka jingplie lad bad jingplie lynti ia ka jing-iadei ba thymmai hapdeng kitei ki arliang ri kiba la ia jngai bad ki bym ju kham don jing-iadei ha kine ki por ba la leit.
La ioh jingtip ba ka Hezbollah ka la ioh ia ka khubor na UAE halor ka jingiakynduh bad ki nongialam jong katei ka kynhun kaba lah ban pyllait noh ia ki nong Lebanon kiba la shah bat bad shah kem ha ka UAE bad don ruh katto katne napdeng jong ki kiba la shah pynngat kyndon pynkheiñ aiñ ha ka UAE bad kiba la shah rai set patok baroh shi jingim.
Kitei kiba shah kem baroh la ong ba ki dei kiba don kti ha ki kam jong katei ka kynhun lehnoh Hezbollah kaba ka UAE ka ju pyrshah bha ha kine ki por ba la leit. Kumta, la ong ba ia kitei kiba shah kem baroh yn sa pyllait noh shen ha kine ki khyndiat sngi ki ban wan bad kin leit bud noh ryngkat bad u Safa ha ka jingleit phai biang jong u sha Lebanon.
Ha ka jingshisha, la ong ba kitei ki heh ka Lebanon ki la ioh ia katei ka khubor naduh shuwa ban sdang ka thma hapdeng ka Israel bad ki lehnoh Hamas ha kaba ki lehnoh Hezbollah na Lebanon ki la ju iakynad bad iather bom markylliang bad ka Israel ha ki thaiñ khappud jong ka Israel bad Lebanon naduh shuwa ban sdang ka thma bad ki lehnoh Hamas.
