Jedah, Lber:
U Secretary jong ka United States- u Antony Blinken ha ka jingleit khmih sha Mideast, u la ong ba u la ioh ban iakren bad u nongialam ka Saudi Arabia halor ki mat ba kongsan kiba iadei bad ka thma jong ka Israel hapoh Gaza bad kumno ban ialeh shitom ban wanrah ia ka jingiasuk hapdeng jong kitei arliang mamla lane ban ioh wat tang ban pynsangeh noh shwa ruh ia ka thma shipor katba dang ialeh ban pynpoi ia ki lad jingiarap bad ki jingdonkam na ka bynta ki paid nongshong shnong ba lui-lui jong ka Gaza, kiba la mad jynjar bad kylla phetwir ha kane ka por tang namar ka jingleit kput jong ka Israel ia ka jingleh jong ki lehnoh Hamas ha u Risaw mynshem snem.
La ong ba utei u Secretary of State jong ka US, u Antony Blinken, u la leit poi sha Jeddah ha ka Sngi Balang ha ka sngi ba sdang jong ka jingleit khmih jong u sha katei ka thaiñ Mideast na ka bynta ban ioh iakren bad u Myntri kam bar ri jong ka Saudi- u Prince Faisal bin Farhan ha shwa ba un ioh ban iakren pat bad u Crown Prince Mohammed bin Salman.
Ha katei ka jing-iakren, u Blinken bad u Faisal ki la ioh ban iakren halor ka jingdonkam ba kyrkieh ban ai jingiada kyrpang na ka bynta jong baroh ki paid nongshong shnong ka Gaza kiba la shu iap ei kha-ma-kha na ka jingleit hiar thma jong ka Israel sha Gaza kaba khlem sangeh shuh. Kumjuh ruh la ong ba katno eh ka long kaba donkam ban ioh pynpoi noh ia ki marbam bad ki jingdonkam ba kitei ki paidbah ki donkam ha kum kane ka por ba kim don shuh wat tang ka iing- ka sem bad ka jaka kaba shngaiñ bad ka bit ka biang ba kin shong ki sah. Hynrei kaba kham kongsan ka long ka bam- ka dih bad ki dawai dashin ban iarap kyrshan bad ban pynneh ia ka bor jong ki tad haduh kaba kut jong katei ka thma hapdeng ka Israel bad ki lehnoh Gaza wat la kin hap ban shah slem sa da ki bnai ne snem.
Shuh shuh ruh la iathuh ba la pynbeit ba u Blinken un leit ban khmih sa sha Egypt hadien ba u la mih na katei ka ri, khnang ba un ioh pat ban leit iakren pynbeit sa bad katei ka ri kaba don marjan bad ka Gaza bad kaba long ruh ka ri kaba la lah ban iarap haba iadei bad ka jingpynpoi ia ki marbam bad ki lad jingiarap sha ki paid nongshong shnong ka Gaza.
