Shillong, Lber 22
U kyrtong shimet ha kane ka ilekshon ban wan sha ka Lok Sabha, u Prof. Lakhon Kma u la ong ba u leit sha ki paidbah ban pynsngew halor ki mat bapher-bapher ba ïadei bad ka Jylla bad um don eiei ban kynthoh pyrshah ïano-ïano.
“Ka jingkyrshan na ki paidbah khamtam ha ki jaka nongkyndong ka la nang kiew bad ngi khmih lynti ba kan ïalam sha ka jingmanbha,” la ong u Prof. Kma.
Haba kylli kumno u sngew halor ki kyrtong ki ban ïa aireng lang ha kane ka ilekshon ban wan na Shillong Parliamentary konstitwensi, u la ong, “Baroh ki ïatrei shitom bad ngi ruh ngi ïaid la ka lynti bad ngim don jingkynthoh pyrshah ïano-ïano naba baroh ki dei ki paralok.”
U la ong ruh ba baroh ka shong ha ka rai u paidbah bad kum u kyrtong, u leit sha ki paidbah ha ryngkat ki nongrim bad ban kren halor ki mat bapher-bapher ba ïadei bad ka Jylla.
U Prof. Kma uba dei ruh u nonghikai ka NEHU u la ong ba ki mat kiba u leit sha ki paidbah ki kynthup ïa ka jingkyrduh kam, ka pule-puthi, ban pynbun ïa ki jaka thoh eksamin CUET hapoh ka Jylla, ka jingpynrung ïa ka ktien Khasi ha ka Khyrnit ba 8 nalor kiwei-kiwei.
Hynrei, ka mat kaba hakhmat eh kaba u kyrtong u la ban jur ka dei halor ka ‘MP Education Fund’ ban ïarap ïa ki khynnah pule na ki longïing ba duna ka ïoh ka kot lada jia ba u ne ka nongkyrshan jong ki, ki mad ne ngat ha kano-kano ka jingjia ba sngewsih.
“Ngin ïaleh ban thaw ïa ka ‘Corpus’ ban ïarap ïa ki khynnah pule lada jia eiei ïa kiba kyrshan ïa ka pule-puthi jong ki khnang ba ka jingpule jong ki kan ym shah ktah,” u la ong.
Ha kajuh ka por, u la pynsngew ba kum u nonghikai, u sngewthuh bha ïa ka pule-puthi bad katei ka sienjam ka long ruh shi bynta ban weng shi syndon ïa ka jingeh ba ïadei bad ka jingpep skul shietng por jong ki khynnah.
Nalor kane, ka jingkajia pud ka long ruh kawei na ki mat jingkular jong u Prof. Kma, ban pynsted ïa ka baibam na bynta ki samla pule ‘Degree’ bad ‘Post Graduate’ kumjuh ka baibam na bynta ki nongïalehkai ka ban kynthup naduh ki jingai jinghikai, ka bam ka dih, jaka sah bad ka jingpule jong ki.
Na ka liang une u kyrtong shimet u la ai jingmut ruh ba ka dei ban don sa kawei pat ka jingkieng nalor ka jingkieng Dam kaba la don lypa.
Shuh shuh kiwei-kiwei ki mat jingkular jong u Prof. Kma ki kynthup ïa ki karkhana shna dawai, karkhana shna jingbam, ban kyntiew ïa ka ïoh kam ïoh jam, ka roi ka par ha ki nongkyndong, ban pynduhjait ïa ka bamsap, ka jingshngaiñ ïa ki nongtrei ba duna ka jingïoh, ki lad pynïasoh kum ki surok, lynti suiñ, ‘Eco-Tourism’ nalor kiwei-kiwei.
U Prof. Kma, u lah ban leit thep kyrteng ha ka Lah Sngi U Blei.
