Shillong, Lber 22
Wat la ka Jylla ka la ïai ap khmih lynti ban khur biang ïa ka takma ksiar ha ka 3rd North East Games 2024, hynrei ka la ïohpdiang da kawei ka takma rupa lyngba uwei na ki rangïakura u Bhalang Shadap lem bad 12 tylli ki takma rnong.
Kane ka jingïoh khur ïa ka takma rupa ka la wan hadien ba utei u rangïakura (Bhalang) uba la shah pyntbit ha ka shlem hikai jong ka SAI Training Centre, u la shah rem noh ha ka jingïakhun final jong ka kyrdan ïakura kaba 67kg kaba la long ha ka sngi Thohdieng ha Kohima.
Kiwei pat ki nongïakura kiba la khur ïa ka takma rnong ki long u Sanjeev Maskut (48kg), Khrawbok Marweiñ (51kg),. Banjop Nongkhlaw (54kg), Sunil Limbu (57kg), Ram Lyngdoh (60kg) bad ka Riteeka Sarki (57kg).
Ha ka Archery, ka kynhun ïalehkai ka Jylla ka la lah ban khur ïa ka takma rnong ha ka Com-pound (men team) hadien ba ka la jop ïa ka Sikkim da 210-207 point. Kane ka la wan lyngba u Phermiki Salahe, Leonaldo Lyngdoh, Ernesaiborson Lyngdoh bad u Sumit Kumar Choudhury.
Ha ka Taekwondo, ka Jylla ka la lah ban khur tang da ki takma rnong lyngba u Honda O Hi Papang ha ka 80 kg, ka Asha Sunar ha ka 40 kg bad ka Evadahunshisha kharmudai ha ka 43 kg.
Ha ka Freestyle Wrestling, ka Jylla ka la lah ban khur 2 tylli ki takma rnong lyngba ka Ïohtilyn Wankhar ha ka 50kg bad ka Mondashisha Marweiñ ha ka 57kg.
Haba phai sha ka Wushu, ka Jylla ka la khur 5 tylli ki takma rnong lyngba ka Juliana Blah ha ka 45 kg, ka lBashisha Nong-rum ha ka 48 kg, Wanpherbha Kharkongor ha ka 56 kg, Francis R.R. Songthiang ha ka 65 kg bad u Mewanpynshngaiñ Nongrum ha ka 75 kg. Kine takma ki dei ba la khur na ka jingïalehkai jong ka Sanda.
Kaba kham sngewtynnad hangne ka long ba ka kynhun ïalehkai Basketball ka Jylla ka la don jingkyrmen ban khur takma ksiar lane rupa hadien ba ka la lah ban pynliem noh ïa ka Nagaland da 60-45 basket na ka bynta ban jam sha ka final.
