New Delhi, Lber:
U Acharya Balkrishna, uba long u Managing Director jong ka Patanjali Ayurved bad u nongïarap jong u Yoga Guru Ramdev, u la pan map ïa ka Supreme Court halor ka jingïalam bakla jong ka kompeni ïa ki paidbah shaphang ka rukom pynmih ïa ki tiar bad ki jingpyndonkam jong ki dawai.
Ïa ka jingpynshisha la phah ha ka sngi Palei, shi sngi hadien ba ka ïingbishar ka la thalaiñ tyngeh ïa ka Patanjali Ayurved halor ka jingbym phah jubab halor ka jingpan jingpynshai ha kaba ïadei bad ka jingïalam bakla jong ki jingpynbna.
Ka kynhun nongbishar jong u Justice Hima Kohli bad u Justice Ahsanuddin Amanullah ka la bthah ïa u Balkrishna bad u Ramdev ba kin leit mih markhmat ha ka ïingbishar ha ka 2 tarik, Ïaïong.
Ha ka jingpynshisha ba la phah sha ka ïingbishar, u Balkrishna u la ong ba u la long uba hakhlieh eh ban khmih bniah ha kaba ïadei bad ka kyndon jong ka aiñ.
Kum shi bynta ban phah ïa ka jingpanmap, u la ong ba ka kompeni ka la pyntikna ba kum kine ki jingpynbna kin ym mih shuh nadien nangne shakhmat.
Ka Supreme Court ha ka lah sngi U Blei ka la hukum ïa u Managing Director jong ka Patanjali Ayurved kaba dei ka kompeni Ayurvedic u Acharya Balkrishna bad u Yog Guru Ramdev ba kin leit mih hakhmat ka ïingbishar na ka bynta ka jingbishar halor ka jingbym ai jubab jong ki ha kaba ïadei bad ka shithi ba la phah sha ki halor ka jingleh bym kohnguh.
Ka Supreme Court ka la phah shithi sha u Ramdev ban batai shai balei ba ïa ka shithi halor ka jingleh bymkohnguh ym shym la phah ne long pyrshah ïa u.
Ka ïing bishar ka la phah ïa ka shithi tang sha ka Patanjali Ayurved bad ïa u MD halor ka jingbym phah jubab jong ki ha kaba ïadei bad ki shithi ba la phah halor ka jingpynkheiñ kyndon na ka jingpynbna paidbah shaphang ki dawai.
Kane kam shym dei ka sien kaba nyngkong ba ka Supreme Court ka la pynibor pyrshah ïa ka Patanjali Ayurved, kaba long trailang bad u Ramdev, halor ka jingïalam bakla kiba la mih lyngba ki jingpynbna paidbah.
Ka ïingbishar bahakhliehduh, ha ka por ba la don kum kane ka jingbishar ha u bnai Rymphang, ka la ong “baroh kawei ka ri ka la shah ïalam kum ha kine ki jingïalam bakla jong kine ki jingpynbna.
Ha ka por ba ka la don ka jingbishar, u Justice Hima Kohli bad u A. Amanullah ki la kynthoh jur ïa ka kompeni Patanjali Ayurved halor ki jingpynbna ba la pyllait ha ka jaka ban ïaid katkum ki kyndon ba la buh da ka ïingbishar ha u snem ba la lah.
Ka jingbishar ka la long shi bynta jong ka jingmudui ka Indian Medical Association’s (IMA) kaba la dawa ba la dei ban pynshitom ïa u Yog Guru Ramdev bad ïa ka Patanjali Ayurved namar ka jingpynjah burom ïa kiwei pat ki sakhi ha kaba ïadei bad ki dawai.
