Nongpoh, Lber 22
Ki nongïalam kiba la mih noh na ka seng United Democratic Party (UDP) ha Ri Bhoi ha kine ki ar sngi ba la dep, ki la leit ban rung noh sha ka sem jong ka National People’s Party (NPP) ryngkat bad ka MDC barim ka Nongpoh, ka Kong Rona Khymdeit, kaba dei na ka seng Congress, ha ka jingïalang kaba la pynlong ha Sajer.
Ïa ka Kong Rona kaba dei ka MDC barim jong ka Nongpoh konstitwensi bad kaba la pynïasoh ïalade sha ka seng Congress ha kine ki khyndiat snem ba la leit noh lem kitei ki nongïalam barim ka UDP Ri Bhoi hapoh ka jingïalam jong u Bah Donbok Khymdeit, MLA barim ka Mawhati konstitwensi, la pdiang burom sha ka NPP da u Bah Prestone Tynsong, President jong ka NPP Meghalaya ha ka jingïa-don lang jong u Bah Sniawbhalang Dhar, National Vice President NPP, ka Kong Ampareen Lyngdoh, kyrtong MP ka NPP na Shillong Parliamentary konstitwensi bad kiwei.
Haba ai jingkren ha kane ka sngi, u Bah Prestone u la pynpaw ïa ka jingsngewkmen halor ka jingwan pynïasoh kitei ki nongïalam, kata ka Kong Rona bad u Bah Donbok ryngkat bad kiwei pat sha ka seng NPP da kaba ong ba ki la wan ban pynïasoh ha ka por kaba biang eh. Hynrei u la kyntu ruh ïa ki nongïalam jong ka seng NPP ba kim dei ban pynran khmut pynran khmat bad ban don ïa kawei ka jingmut ban ïatreilang na ka bynta ban kyntiew shaphrang ïa ka district baroh kawei.
U la ong ruh katba ki dang mih shibun ki jingkynthoh bad jingbeiñ jingkhoh pyrshah ïa ka seng NPP khamtam hashwa jong ka por ilekshon, katta ruh ki dang bun kiba wan ban pynïasoh sha ka NPP da kaba ong ruh ba bunsien hi u khiew uba thylli u sawa kat shaba lap ba shem bad mynta la nang mih shuh shuh ki seng ki bym ithuh ithaw kiba kren ieid jaitbynriew hynrei ynda poi tang ha kad liengsuiñ (Airport) ki jah lynti noh.
“Shu jait shi jaitbynriew, jait shi jaitbynriew…phi ieid haduh katta ïa ka jaitbynriew Khasi Jaiñtia, leit buh ophis ha Delhi. Ym dei tang kata, buh ki nongtrei ki ban ïarap lem ïa ki khun samla ki jong ngi kiba shah thok ha ki kam ha ki jam. Wat ju heh nia tang kum u pyrthat rkhiang,” la ong u Bah Prestone. Lah ban kdew ba ka NPP, namar ba ka dei kata ka ‘National Party’, ka don ïa ka shlem treikam jong ka ha North Avenue jong ka nongbah Delhi.
Na ka liang u Bah Donbok, haba ai jingkren, u la pynpaw ba ka jingrai ban ieh noh ïa ka seng UDP kam dei satia ba u ïa don daw badno badno, hynrei ka dei ka jingïapynbeit lang bad ki nongïalam bad ki nongkyrshan namar kumba ka long mynta, ka distrik ka donkam ban ïoh shibun ki kam pynroi ban kyntiew shaphrang ïa ka da kaba kam ruh ba dei tang ka sorkar NPP kaba lah ban pynurlong ïa ki jingdonkam jong ki paidbah. Na ka liang ka Kong Rona ka la pynpaw ba hadien bunsien ka jingïakynduh bad ki nongïalam ka NPP ka sngewdei bad ïohi ba ka dei tang kane ka seng kaba lah ban wanrah ïa ka roi ka par ym tang ha ki jingkular hynrei kaba ïaid ryngkat-ryngkat bad ki kam ki jam bad ba ka dei tang kane ka seng kaba ai jingkyrmen ïa ki khun ki kti bad ka lawei jong ka jylla.
