Itanagar, Lber:
Ka seng Congress ha ka Sngi Palei ka la pynbna ïa ka thup kyrteng kaba nyngkong jong 34 ngut ki kyrtong ki ban ïakhun ïa ka ilekshon Assembly ban wan ha Arunachal Pradesh, ka ban sa long ha ka 19 tarik, Ïaïong.
Napdeng kine ki kyrtong lai ngut ki dei ki Myntri barim bad lai ngut ki dei ki kynthei, ha kaba kine ki dei ki kyrtong kiba dang ïakhun ha ka sien kaba nyngkong.
Ïa kine ki kyrteng la pynbna da ka kynhun ba dei khmih ïa ki kam ba ïadei bad ka ilekshon jong ka All India Congress Committee (AICC).
Ha kaba ïadei bad kane la ong ba ki kyrteng jong u President jong ka Arunachal Pradesh Congress Committee (APCC) bad u Myntri Rangbah barim u Nabam Tuki, ha ryngkat ka kyrteng jong u Vice-President jong ka APCC u Bosiram Siram, kim shym la don hapoh ka thup. Hynrei, katkum ka jingpynbna ba la wan na ka seng, la ong ba kine baroh ar kata u Tuki bad u Siram ki lah ban ïakhun kum ki kyrtong jong ka ilekshon Lok Sabha na Arunachal West bad East Parliamentary konstitwensi.
U Tuki u la long u MLA ba mynta na Sagalee konstitwensi kaba don ha Papumpare distrik. U la mihkhmat na kane ka konstitwensi da kumba hynriew sien.
Ka seng Congress haduh mynta kam pat pynbna ïa ki kyrteng jong ki kyrtong ki ban ïakhun ha ki ar tylli ki Lok Sabha konstitwensi ha ka jylla.
Napdeng ki kyrteng kiba paw kum ki kyrtong la kynthup ruh ïa ka kyrteng jong ki Myntri barim u Kumar Waii (Bameng), Takam Pario (Palin), bad Tanga Byaling na Nacho konstitwensi.
Shuh shuh ka seng ka la kynthup lang ïa ki kyrteng jong ki kyrtong kynthei, kiba ïakhun ha ka sien kaba nyngkong kiba kynthup ïa ka Gollo Yapung Tana na Pakke Kessang konstitwensi, Jermai Krong (Tezu) bad ka Marina Kenglang ban ïakhun na Changlang North konstitwensi.
Ki katto katne ngut ki ban ïakhun ha ka sien kaba nyngkong ki kynthup ïa u Sanhey Phutsok na Mukto konstitwensi ba la mihkhmat da u Myntri Rangbah u Pema Khandu, Kompu Dolo (Chayang-Tajo), Tame Gyadi (Seppa East), Nabam Tado (Doimukh), Rughu Tado (Tali), Reri Kirbe Dulom (Daporijo), Yomkar Riba (Basar), Tallng Yaying (Rumgong), Takku Jerang (Panging), Bimar Dabi (Nari-Koyu) bad Okom Yosung (Pasighat East).
