Shillong, Lber 22
Ka Shillong Lajong FC ka la khur ïa ka jingjop kaba nyngkong eh ha ka lympung ïalehkai Shillong Premier League Division 2023-24 hadien ba ka la lah ban pynliem noh ïa ka Langsning FC da 3-2 kol ha ka Sngi Thohdieng ha SSA Stadium, Polo.
Tang mar ïasdang ka jingïalehkai, ka Shillong Lajong ka la ïoh ban pynkhih jar nyngkong eh lyngba u Deibormame Tongper ha ka minit kaba 3. Hadien 5 minit ka la ïoh ei sa shi kol na ka daw ba kum bakla thep hi u rangïalehkai ka Langsning u Lukas Syngkli.
Nangta hapoh shiteng kynta, ka Shillong Lajong ka la ïoh ban thep haduh lai kol bad ia kane ka kol la thep da u Gladdy Nellen Kharbuli ha ka minit kaba 28. Kumta ha shwa ban kut ka jingïalehkai jong ka kylla step, ka Langsning ka la lah ban pynphai kylla shi kol lyngba u Overkindness L. Mawnai ha ka minit kaba 45 bad ka la pynlong ïa ka Lajong ban tam da 3-1 kol.
Hadien 4 minit ba la bteng ïa ka jingïakhun jong ka kylla miet, ka Langsning ka la ïoh ban thep biang ïa ka kol ba ar lyngba u Nelson Rymbai. Kane ka shi kol ka la nang pynïoh mynsiem ïa ki rangïalehkai kane ka kynhun bad kumjuh ïa ka Lajong ba kin ïakhun tyngeh, hynrei kine ki kynhun kim shym la lah shuh ban thep kol haduh kaba kut ka jingïalehkai bad ka Lajong ka la kamai ïa ki lai point.
Ka jingïalehkai ha ka Sngi Saitjaiñ kan long hapdeng ka Mawlai SC pyrshah ïa ka Ryntih SC ha ka por 3 baje janmiet.
