Mawkyrwat, Lber 22
Ka Shillong Lajong FC ka la jam sha ka final ha ka lympung ïalehkai Mawlangwir Football Invitation Tournament 2023-24 hadien ba ka la lah ban pynliem noh ïa ka KMC Sonapur FC da 4-1 kol ha Rowell Lyngdoh Stadium kaba ha Sait-snad, Mawlangwir.
Kane ka nam jop jong ka Shillong Lajong ka wan hadien ba ka lah ban pynliem noh ïa ka KMC Sonapur lyngba ka jingïashut tie-breaker ha ka semi-final wat ba-ar kaba la long ha ka Sngi Palei.
Haba phai sha kane ka jingïalehkai ka long shisha kaba itynnad bad ïakhaid bha ha ryngkat ka jingsakhi lang jong hajar ngut ki paidbah khamtam ka Shillong Lajong kaba la ïakhun tyngeh naduh ba sdang ban pynïakhaid ïa ka kol kaba ka la shah tam lypa da 2-1 kol ha ka KMC ha ka wat nyngkong.
Ka KMC ruh naduh ba sdang ka la ïalehkai bha bad kam ailad ïa ka Shillong Lajong bad pynkhih jar bad baroh ar kynhun ki la ïoh ïa shibun ki kabu kiba biang, hynrei haduh ban da ka kut ka kylla step kim shum la lah ban pynkhih jar.
Haba phai sha ka jingïalehkai jong ka Kylla miet, ka Shillong Lajong ka la ïakhun dohïap bad trei shitom ban ïoh thep shi kol lyngba u Baby Sunday Marngar ha ka minit kaba 75. Lyngba kane ka kol ka Shillong Lajong ka la lah pynïakhaid ha kaba baroh ar kynhun mynta ki la ryngkat mar katjuh kol haduh ban da kut ka jingïalehkai.
Hadien ba la bteng ka jingïakhun ha ka extra time kaba ki nongpynïaid ki la ai por tang mar san minit mar shiliang, ka jingïalehkai ka la nang itynnad shuh shuh bad ka KMC Sonapur ka la ñoin tyngeh bad ïoh shibun ki kabu ban thep kol namar ka Shillong Lajong ka la hap ban ïakhun sa tang khyndai ngut namar ka jingshah sei red card uwei rangïalehkai shapdeng, hynrei haduh ban da kut ka jingiakhun ka poi sha ka jingïakhaid.
Bad dei ha ka jingïashut tie-breaker ba ka Shillong Lajong ka la pynthikna ïalade ban rung sha ka final ha kane ka lympung hadien ba ka la lah ban pynrung 4 tylli ki kol, katba ka KMC Sonapur ka la pynrung tang kawei.
Kum ban shu pynkynmaw ha ka jing-lehkai semi final (1st Leg), ka KMC Sonapur FC ka la jop da 2- ïa ka Shillong Lajong bad ha ka wat kaba ar ka Shillong Lajong ka la lah ban thep 1-0 kol bad haba kheiñ lang ïa ki kol ka la poi sha ka jingïakhaid.
Ïa ka nam Man of the Match ha kane ka sngi la ïoh da u rangïalehkai jong ka Shillong Lajong u Baby Sunday Marngar.
Ka Mawlangwir SC ka la pyntip ruh ba ka jingïalehkai final jong kane ka lympung kan long ha ka 13 tarik u Ïajong 2024 hapdeng ka Golden Lion FC pyrshah ïa ka Shillong Lajong FC bad ka kynhun ka ban rah ïa ka nam lahduh kan ïohpdiang ïa ka khusnam pisa kaba T.10 lak tyngka bad kaba wan ba-ar kan ïoh T.5 lak tyngka.
