Shillong, Lber 22
Ka BJP Meghalaya ha ka Sngi Thohdieng ka la dawa na u MP ka Shillong uba long ruh u kyrtong ka seng Congress, u Bah Vincent H Pala, ba un ai ïa kawei ka jingpynshisha ba thikna halor ka jingkynnoh ka jong u ba ka seng BJP kam burom ïa ka Balang Khristan bad lada um lah, u dei ban shim biang noh ïa kaei kaba u la kynthoh.
Ha u kyrwoh khubor, ka BJP ka la ong ba ka la dep ban kdew ban pyni ïa kiba bun kiei-kiei kiba u Myntri Rangbahduh, u Narendra Modi, u la leh ha kaba u la leit peit bad leit khmih sngewbha ïa ka balang bad ïa ki nongïalam jong ka bad ïa kiei-kiei kiba dei jong ka balang Khristan, bad ïa ki kam ba bha ba la leh da ki nongïalam jong ka seng.
“Ka seng ka pynkynmaw ïa u Bah Pala ba kumno ha ki jinglehkmen Khristmas la pynlong ïa ki jingïalang sngewbha ha ïing sah u Myntri Rangbahduh u Narendra Modi bad ha ki jingkren jong u, u la ïaroh ïa u Jisu Khrist bad ki jinghikai jong u. U Myntri Rangbahduh u la ong ruh ba u Khrist u la trei bad lum ban pynlong ïa ka imlang sahlang kaba mar ryngkat, ba katjuh bad ba ai ïa kajuh ka hok ïa baroh. U la ban ruh ba kine ki jingtrei ne ki kam u Jisu Khrist ki long ki jingshai ba shat thaba na bynta ka roi ka par jong ka ri,” la ong ka BJP haba pynphai ktien ïa u kyrtong ka seng Congress.
Nalorkata, ka BJP ka la kylli ba mano na ki nongïalam Congress kiba ju kren bad ai kum kine ki jingkren? Ka seng ka la ong ba ka kwah ba u Bah Pala un jubab ïa kane ka jingkylli.
Ka BJP Meghalaya ka pyni bad kdew ruh ba ha ki por lehkmen Khristmas ki nongïalam ka seng kum u Bah A.L. Hek bad kiwei-kiwei ki la pynlong ïa ki jingleh sngewbha na bynta ki khynnah bad kito kiba duna ha ka ïoh ka kot, bad kane ka la pynsaphriang ïa ka jingkmen, bad kaba long pyrshah ïa ka jingthaw bad shna khana ba la kren kum u Bah Pala. U Bah Mariahom Kharkrang, uba long u nongaiktien ka BJP ha Meghalaya, u la ong, “Ka Congress ka la sngewthikna ba ka lad jingjop jong ka ka la nang troiñ bad hair arsut kat nang mih ki sngi bad ka BJP pat ka la nang kiew irat. Kum kine ki jingkren kynthoh ki dei tang ki buit bad ki lad ki lynti ban pynngeit, pynkohnguh ne ïalam bakla ïa ki paidbah ban pyrshang ban ïoh da ki ‘vote’ sngewsynei ban ïoh jingkyrshan.”
