Shillong, Lber 22
Ka Jylla Niambah Shillong lane Shillong Archdiocese jong ka Balang Katholik kan ïoh sa kawei ka Parish thymmai kaba pura lyngba ka jingkyrkhu ïa ka Mawïong Parish ha ka 24 tarik u Lber 2024.
Ka Mawïong Parish ka dei ka Parish thymmai kaba la pynkha na ka Parish Mawlai kaba dei ruh kawei na ki Parish ba heh ha ka Jylla Niambah Shillong jong ka Balang Katholik.
Na Mawlai Parish, la pynkha ar tylli ki Parish thymmai, kiba kynthup ïa ka Parish Mawïong bad ka Parish Mawtawar kaba dang shu dep ban kyrkhu ha ka 17 tarik u Lber 2024.
Ïa ka Parish Mawïong yn sa kyrkhu da u khlieh ka Balang Katholik jong ka Shillong Archdiocese, u Most Rev. Archbishop Victor Lyngdoh, DD.
Ka jingplie paidbah ïa kane ka Parish bathymmai ha ka 24 tarik u Lber, 2024 kan long ha ka por 9:30 baje mynstep.
Kumta ki paid riewngeit na ki shnong kiba kynthup ïa ka Mawlai Nongkwar, Mawlai Umthlong, Umjajew, Mawïong Umjapung bad Mawïong Rim ki la pynkhreh shaid-shaid ban pynlong ïa kane ka sngi plie paidbah ïa ka Parish bathymmai kaba iphuh-iphieng bad kaba ai burom sha U Blei Trai Kynrad na ka bynta ki jingkyrkhu jong U baroh. Ki jingpynkhreh ki long da ki jingduwai, ki kyntien pdiang sngewbha bad ki prokram bapher-bapher na ka bynta ki paid riewngeit, ki lok ki jor bad kito kiba ieid kyrpang ïa kine ki shnong bad ïa ka Balang ha katei ka sngi.
Namar kata, la khot la wer ïa ki paid riewngeit kiba najan bad najngai ban wan ïasnoh kti bad ïashimbynta lang ha ka sngi bakhraw ha katei ka sngi ba plie ïa ka Parish bathymmai.
Ka Parish bathymmai ha shnong Mawïong kaba long ruh kum ka khyrdop sha sor Shillong, ka la wanrah shisha ka jingkmen kaba khraw ïa ki paid riewngeit Katholik kiba don ha kane ka shnong bad ki shnong kiba marjan.
Ka Parish kmie ha Laitumkhrah, ka la kylla long mynta ka Mei ieit kaba la kha shibun ki Parish ym tang hangne ha Meghalaya hynrei wat ha ka dong Lam Mihngi ka ri India.
Haba phai sha ka Parish Mawlai, ka khana jong ka Balang ka batai ba, ka Parish Mawlai mynshwa la tip da ka kyrteng Sacred Heart Church, bad ka dei kaba la kha na ka Parish Laitumkhrah ha u snem 1939 ha kaba u Fr. Benedict Fiori u la long u Parish Priest lane Phadar Rangbah uba nyngkong eh.
Hynrei namar ka Thma Bah Ba-ar, u Fr. Benedict Fiori u la shimti kum u Parish Priest tang shipor naduh ka 8 tarik Risaw haduh 19 tarik Nohprah, 1939. Ka Parish Mawlai ka la kylla long ka Parish dei lyngba ki kam jong u Fr. C. Vendrame uba ju leit jngoh khah-khah ïa ka thaiñ Mawlai ha ka por ba u shimti kum u Parish Priest ka Parish Laitumkhrah.
U Fr. Vandrame u la tei ruh ïa ka Shrine of Sacred Heart kaba la pynkyntang ha ka 13 tarik u Ïaïong, 1935.
Dei ruh ha ka por jong u Fr. Albert Correngia kum u Parish Priest naduh u snem 1951 haduh 1959 ba la tei ïa ka Ïingmane jong ka Parish bad la ai kyrteng kum ka ‘St. Dominic Savio Church’. Hadien kane, la maramot bad pynheh shuh shuh ïa ka Ïingmane jong ka Parish ha ka por jong u Fr. Gervasis Kozhuppathadam kum u Parish Priest naduh u snem 1991 haduh 2003.
