Moscow, Lber:
Uwei u nongpyniap briew ba shyrkhei jong ka Russia ba la ju tip kum u ‘Volga Maniac’, ha ka Sngi Palei u la shah rai pynrem ban patok baroh shi jingim halor ka jingpyniap ia 31 ngut ki kynthei hapoh katei ka ri. Ia utei u runar la ju ithuh kum u Radik Tagirov bad u la shah kem naduh u snem 2020 tang mar ia ioh jingtip halor ka jingdon kti ban pyniap ia bun ngut ki kynthei ha katei ka ri. Ia katei ka kam bymman u la leh ha ki 15 tylli ki nongbah bad kham bun ha ki thaiñ Tatarstan, kumba 730 Kilometre lane 450 Mile na ka phang Mihngi sha nongbah Moscow bad u la sdang ia katei ka kam pyniap briew ha ki snem 2011 bad 2012.
Ki bor ka aiñ jong ka Russia ki la iathuh ba utei u briew teng-teng u ju leh mynleh kum u nongtrei kam paidbah, nongshna bording lane u nongshna um tang ba un ioh ban leit rung ha ki iing jong kitei ki kynthei ha shwa ba un ioh ban pyniap bad lute ia ki jingdeng bad ki tiar ba rem dor na ka iing jongki.
La ong ruh ba u Tagirov u dei uba la don dak sniew bad uba la dep shah pynshong patok teng namar ki kam tuh- kam thiem ha kitei ki snem shwa ba un leh ia kitei ki kam runar bad kam pyniap briew ba shyrkhei. Ka ïingbishar na Kazan ruh ka la dep lap teng ia ki kam runar jong u kiba u la pyrshang bad sdang ban buh jingma ia ka jingim jong ki kynthei ha kitei ki por ba la leit namar u la ktah kti ruh ia palat 34 ngut ki kynthei kiba la kham heh rta.
