Shillong, Lber 22
Ka East Khasi Hills district kaba don bun eh ki konstitwensi napdeng ki district, ka donkam kumba 18 pyrton ki pulit Central Armed Police Force (CAPF) na ka bynta ka jingpynlong ïa ka ilekshon sha Ïingdorbar Lok Sabha ha Shillong Parliamentary konstitwensi ha kaba ka jingthep vote kan long ha ka 19 tarik u Ïaïong.
Ka East Khasi Hills district ka la pan lyngba ka Sorkar Jylla kumba 11 pyrton ki pulit Central Reserve Police Force (CRPF) bad 7 pyrton ki pulit ka Jylla.
Kumba 3 pyrton ki pulit CAPF kiba kynthup ïa ki CRPF ki la don lypa ha Jylla.
U Superintendent of Police, u Rituraj Ravi, u la pyntip ba ka tnat pulit ka la thaw ïa ki kynhun Flying Squad Team (FST) bad ki Static Surveillance Team katkum ki jingbthah ka Election Commission of India (ECI).
U la ong ruh ba ki pulit ka Jylla ki la shimkhia ban shim ki lad ki lynti na ka bynta ban pynneh ïa ka suk ka saiñ hapoh ka district baroh kawei.
U la kyntu ïa ki paidbah ban leit thep ‘vote’ da kaba mih ryntih kumba ka long ha ki snem ba la leit noh bad khlem kano-kano ka jingtieng jingsyier ban pyndep ïa la kamram kum u nongshong shnong.
