Shillong, Lber 22
Hadien ka jingap kaba la bun sngi, ka seng Bharatiya Janata Party (BJP) ha ka Sngi Thohdieng ka la pynbna ban ym pynïeng kyrtong ha ka ilekshon MP Lok Sabha na Shillong bad Tura Parliamentary Constituency, bad kan kyrshan ïa ki kyrtong ka seng National People’s Party (NPP) na baroh artylli ki konstitwensi.
Ïa kane la pynbna da u nongaiktien ka seng BJP, u Dr Sambit Patra, lyngba ka rynsan ‘X’.
“Katkum ka jingbthah jong u National President ka BJP, u JP Nadda, nga sngewbha ban pyntip ba ka BJP kan ai jingkyrshan ïa ki kyrtong ka NPP ha baroh artylli ki konsti-twensi Lok Sabha ha Meghalaya (Shillong bad Tura),” la ong u Dr Patra.
Ha kajuh ka por, u la ong ba ka BJP kan kyrshan ïa ka seng Naga People’s Front (NPF) na ka Outer Manipur konstitwensi bad ïa ka seng NDPP ha ka jylla Nagaland na ka bynta ka ilekshon MP Lok Sabha.
Kane ka jingpynbna na ka liang ka BJP na Delhi ka la wan ha ka por ba ki la don ki jingpynbna ba ki la don bun ngut kiba la pan tiket ban ïakhun ïa ka ilekshon MP na Shillong bad Tura.
Na Shillong Parliamentary Constituency, ki kyrteng kiba la paw ki long kum u Myntri Sorkar, u Bah Alexander L Hek, u President barim ka BJP Meghalaya, u Bah Ernest Mawrie, bad ka nongïasaid aiñ, ka Dr Fenela Lyngdoh Nonglait.
Ha Tura, ki kyrteng jong ki nongpan tiket kiba la paw ki long u MDC ka Tura bad u Vice President ka BJP, u Bernard Marak, u CEM barim ka GHADC, u Boston Marak, bad kiwei.
Lah ban kdew ba ha u snem 2019, ka BJP ka la pynïakhun da u MLA ka South Shillong, u Bah Sanbor Shullai, na Shillong Parliamentary Constituency bad da u Rikman G Momin na Tura Parliamentary Constituency.
