Bengaluru, Lber:
U Myntri Rangbah jong ka jylla Karnataka u Siddaramaiah ha ka sngi Palei u la phah da ka shithi sha u Myntri Rangbah jong ka Maharashtra u Eknath Shinde, ha kaba u la kyrpad ïa u ba un pyllait ïa ka um na Warna/Koyna Dam sha ka wan Krishna bad ka wah Bhima khnang ban lah ban pynbiang ïa ki jingdonkam um jong baroh ar, kata jong ki briew bad ki jingri ha ki bynta ba shaphang Shatei jong ka Karnataka.
Ka shithi ba la phah ka la kyrpad ïa ki heh ba dei khmih halor kane ka bynta ba kin pyllait noh kham kloi ïa ka um kaba 2.00 TMC ka um na Warna/Koyna Dam sha ka wah Krishna bad 1.00 TMC na Ujjani Reservoir sha ka wah Bhima. Ha ka shithi kaba u la phah sha u Shinde, u Myntri Rangbah jong ka Karnataka u la ong ba ka aïom Lyiur ka dang kham shim por bad dang ar tatien halor ka jinghap jong u slap ba neh ïa mynta ha kine ki bnai ban wan.
“Kumba ka long mynta, ki distrik kiba don ha ki bynta ba shaphang Shatei jong ka Karnataka ki la ïakynduh jingeh shibun na ka jingrang tyrkhong namar ka jingbym ïoh bha ïa u slap. Ki jaka pyllang um ki la duna um bha ha kaba kane kam lah shuh ban pynbiang ïa ka um na ka bynta ki briew bad ki jingri. Ka aïom Lyiur ka dang shim por ban wan bad ym lah ban ïoh ïa u slap bajur bad baneh ha kine ki bnai hashwa ba ka aïom slap kan wan,” la thoh u Myntri Rangbah ka Karnataka ha ka shithi.
