Shillong, Lber 22
Ki pulit ka Jylla ki la nang lapksai lyngba ka jingtohkit ïa ki briew kiba siew pisa sha ki kynhun bad seng lehnoh bad ha kajuh ka por ki kam pat ïalade kum kita ki lanot kiba ngat na ka jingshah dawa.
Ka aiñ kum ïa kita ki briew kan trei beit bad pynngat ha ki kyndon kiba ïadei bad ki seng kiba leh ïa ki kam pyntriem.
Haba ïakren bad u Superintendent of Police (SP) ka East Khasi Hills district, u Rituraj Ravi, u la ong ba kito kiba shah dawa pisa lada ki dei ki lanot ki hap ban ujor namar ka jingkloi jong ki ban siew pisa ka pyni ba ki ruh ki donbynta lang ha kiwei pat ki kam beaiñ kiba yn sa leh da ki dkhot jong ki kynhun seng ynda ki la ïoh pisa.
U la ong ba ka aiñ kam ailad bad kan trei da kaba tyngeh. Namar kata, u la kyrpad ïa kino-kino kiba shah dawa pisa bad kim dei ban siew sha kino-kino ki kynhun lehnoh namar ka jingai pisa jong ki ka long kum ka jingaibor ïa kata ka kynhun ban leh kam sniew.
U la ong ba ha kane ka juk jingstad lyngba ki kor ki bor , ki kynhun lehnoh ruh ki pyrshang ban treikam katkum ka jinglong kane ka juk hynrei kim lah ban phetrieh namar ki briew jong ka aiñ ki ap kmang ban bud nadien jong ki bad tip lut ïa ki kam ba ki leh.
Kumta u la ong ba ka Jylla ka donkam ïa ka suk ka saiñ bad ki pulit ki trei na ka bynta ban ai jingshngaiñ ïa ki nongshong shnong.
