United Nations, Lber:
Katkum ki khubor, la ong ba ka United States kaba la khanglad bad kyntait man ka por haba iadei bad ka jingkyntu jong ki tnat bad ki ri bapher-bapher ban ialeh ban pynsangeh noh ia ka thma ha Gaza, ha kane ka kynti ka la hap ban ai noh ia ka rai ba khatduh la kan ai jingkyrshan ne em ia katei ka jingkyntu ban phah sangeh noh ia ka Israel ban hiar thma ha Gaza, khamtam ha kum kane ka por ba ki paidbah ba lui-lui ka Gaza ki la shah ktah jur bha bad ki donkam kyrkieh ia ki jingiarap naduh ka bam- ka dih, ki dawai- dashin bad ia kiwei de ki jingdonkam kiba bun bad kim lah shuh ban ioh hynrei ki la shu shah satar naduh ba sdang ka thma haduh kane ka kynti.
Kumta, la ong ba ia katei ka rai, ka United Nations kan hap ban shim ha ka Sngi Thohdieng bad kaba mih na kane ka rai yn sa ban pynbna paidbah pat ha ka Sngi Saitjaiñ ynda la pyllait ia ka khubor kaba shai ha katei ka sngi ba la buh.
La ong ba katei ka rai na ka United Nations kan long ka rai na bynta ka bha ka miat bad ka jingpynkylla thymmai ia kiei-kiei baroh haba iadei bad ka thma jong ka Israel hapoh Gaza Strip. Lada jia ba ka UN lane ka US kan ai ka jingkyrshan kaba skhem haba iadei bad katei ka jingdawa ban phah sangeh thma noh ha Gaza, ka lah pat ban wanrah noh ia ka shongsuk-shongsaiñ bad kan long ruh ka lad ban tehlakam ia ki jingeh bad jingiakynad kiba bun ba ki ri bapher ki la sdang ban thaw jingiakynad ha kine ki sngi.
