Shillong, Lber 24
Ka Meghalaya Football Association (MFA) ka la rai ban pynlong biang ïa ka lympung Meghalaya State League kumjuh ruh ïa ka Meghalaya Youth League lem bad ka Women’s League mynta u snem 2024.
Ïa kane ka rai la shim ha ka jingïalang kaba la pynlong ha ka sngi Saitjaiñ ha kamra jingïalang jong ka Shillong Sports Association (SSA) ha Polo.
Kine ki zone kin long ka East Khasi Hills, West Khasi Hills, Jaiñtia Hills bad Garo Hills.
Haba ïakren bad ki nongthoh khubor, u General Secretary ka MFA u Bah Sunesh Syiem u la pynpaw ba ki kynhun ki ban ïoh ïashim bynta ha ka lympung Meghalaya State League kin dei ki lahduh na ki lympung ïalehkai ba la pynlong da ki synjuk ïalehkai bapher bapher ha baroh ki district jong ka Jylla.
Wat la ha ka MSL ba la dep, kiba bun ki klob ki la pynpaw ïa ka jingsngewdiaw halor ka jinglyngkot jong katei ka lympung, hynrei mynta ka kynti ka MFA kan kynthup lang ruh ïa ka jingïalehkai quarter final khnang ban ailad haduh ar tylli ki kynhun ïalehkai na kawei-pa-kawei ka zone ba kin ïoh ïalehkai ha ka quarter final.
“Ka jingpynlong ïa ka MSL ha ka aïom ba la lah kam da pynhun ïa kiba bun ki klob namar ki ïoh ïalehkai tang ar sein lai sien ki la kut noh namar tang kawei ka kynhun na kawei pa kawei ka zone ki rung sha ka semi-final, hynrei mynta u snem ngin pynrung lang noh ïa ka quarter final khnang ban ailad haduh ar tylli ki kynhun na kawei-pa-kawei ka zone,” la ong u Bah Syiem.
Ha kaba ïadei bad ki jaka ïalehkai ban pynlong ïa kane ka lympung, u Bah Syiem u la ong ba ka Competition Committee jong ka MFA kan sa rai ïa ki jaka ban pynlong ïa kine ki jingïakhun namar ki dang don ki madan kiba thymmai kiba donkam ban pan ban ïoh pynlong ïa kane ka lympung.
Halor ka Meghalaya Youth League pat, ka MFA ka la rai ban phiah ha ki ar tylli ki lympung ïalehkai kata ka Under-13 bad ka Under -15, namar lyngba kine ki lympung ka Jylla ka lah ban sei kynhun ban ïashim bynta ha ka lympung Sub-Junior bad Junior ki ban long shabar ka jylla.
Ïa kane ka lympung ïalehkai Youth League bad Women’s League yn sa pynbna hadien, katba ïa ka MSL lah ban pynlong ne sdang naduh ka 15 tarik u Jymmang.
