Shillong, Lber 24
Ka Rangkynsai Cricket Club ka la khur jingjop ha ka lympung ïalehkai Super Division Shillong Cricket League ba la pynïaid da ka Shillong Cricket Association kaba la long ha ka sngi U Blei ha madan Polo.
Haba phai sha ka jingïalehkai, ka Rangkynsai Cricket Club kaba la hap ban tied nyngkong hadien ba ka la shah rem ha ka jingkynting pisa (toss), ka la kamai haduh 272 run na ki 42.3 overs bad hap lut baroh ki wiket.
Ki nongtied ka Rangkynsai kiba la ïoh kamai run ha kane ka jingïalehkai ki long u Kishan Lyngdoh uba la tied 62 run tang na ki 47 tylli ki bol bad u Savian Blah u la tied 57 run na ki 35 tylli ki bol. U Ankit Yadav ka Spartan uba la kawang bol ha ki 7.3 over u la shim 4 wiket bad ai 50 run bad u Mani Bhusan Thakur pat na ki 9 over, u la shim 3 wiket bad ai 43 run.
Haba beh ïa katei ka thong kaba heh, ki nongtied ka Spartan ki la lah ban kamai tang 137 run bad hap lut baroh ki wiket na ki 32.1 over. Dei tang u Dipankar Barua marwei uba la tied haduh 75 run na ki 79 tylli ki bol bad u Gagandeep Singh u la tied 14 run na ki 35 tylli ki bol, katba u Ram Gurung uba la kawang 9 over u la ai 35 run bad shim 3 wiket, u Ajay Duhan pat u la shim 2 wiket na ki 6 over bad ai 19 run.
Kumta kane ka la pynlong ïa ka Rangkynsai CC ba kan jop ïa kane ka jingïalehkai da 135 run bad ha kane ka sngi ïa ka nam ‘Player of the Match’ la ïoh da u Savian Blah uba la tied 57 run bad ruh ban khur 1 wiket.
