Shillong, Lber 24
U Rev. W.C Khongwir u la pynpaw ka jingsngewkhia halor ka jingbun palat ki tamasa ha nongbah Shillong kiba pynjot ïa ki khun samla katba ka jylla ka nang hiar ha ka pule-puthi, ka jingdap ram, wat ha ka jingïalehkai North East Game ka la hiar shatrai haba ïanujor bad kiwei ki jylla.
U Pastor Khongwir u la pynpaw ïa kine ki jingsngewkhia dei haba u ai jingkren ha ka Jingïaseng Khasi Jaiñtia Presbyterian Provisional Synod Pdeng jong ki Rangbah kaba II kaba la long ha Balang Presbyterian Kharang, kaba hap ha Mawkynrew Presbytery, East Khasi Hills District kaba la pynkut mynta ka Sngi U Blei ka 24 tarik Lber 2024.
Ha kane ka jingïaseng la ïohi ba ki riewngeit ki la poi palat phew hajar namar ka jingdheng kali ka la sdang naduh Smit ter ter sha Jongksha shaduh Kharang namar ki don kiba poi sha ka jingïaseng haduh 12:00 baje mynsngi shwa ban kut ka jingïaseng kaba nyngkong. Ha kane ka sngi la pynrhem ïa ka jingïaseng da ka jingrwai jong ka Jingïaseng Khynnah Balang Kharang, Standing Choir Shillong Sepngi Presbytery, Khatar Balang Presbytery Standing Choir, Laitumkhrah Presbytery, Balang Kharang, Mawkynrew Presbytery bad KJP Synod Pdeng Standing Choir.
Ha kane ka sngi la ïadonlang ruh ki MLA naduh u Bah Banteidor Lyngdoh bad Bah Heavingstone Kharpran.
U Pastor Khongwir u la ong ba lada don ki tamasa kiba don jingmut u sngew ba dei ban ai jingkyrshan hynrei ki don ki tamasa kiba pynjot ïa ki khun samla, katba ka jylla pat lada phai ha kiba bun ki liang ka la hiar. Kumta u la kyntu ïa ki nongsynshar ba kin long kiba shim khia ban kyntiew ïa ka jylla.
Haba sam ïa ka ktien U Blei, u Pastor u la pule na ka kotbah na Kitab Jenesis ka lynnong 33 bad ka dkhot 12, kaba dei shaphang ka jingïalong shipara u Jacob bad u Iso. Kumjuh ruh ka Khasi Jaiñtia Presbyterian Synod Pdeng Standing Choir kan sa ïoh ban ai ki jingrwai ha ka Jingïaseng General Assembly jong ka Presbyterian Church of India kaba dei ka jingïakynduh lang jong 12 tylli ki synod ka ban long ha Aizawl, Mizoram kaba la pdiang da ka Mizo Synod ka ban long ha u Jymmang mynta u snem.
Ha ka jingïaseng PCI ha Mizoram la khmih lynti ba ka Khasi Jaiñtia Presbyterian Provisional Synod Pdeng kan sa shah ban ithuh noh kum ka synod kaba pura hadien ba la mih noh na ka KJP Synod Mihngi.
Ka Jingïaseng KJP Synod Pdeng kan dei ka Jingïaseng Synod kaba khatduh jong mynta u snem (2024) namar ka KJP Synod Sepngi, KJP Synod Mihngi bad Ri Bhoi Synod ki la dep pynlong lut.
